ಚೆನ್ನೈ, ಅಕ್ಟೋಬರ್ 20: ತಮಿಳು ಚಿತ್ರರಂಗದ ಖ್ಯಾತ ನಟ ಧನುಷ್ ರಾಜಕೀಯ ಪ್ರವೇಶಿಸಲಿದ್ದಾರೆ ಎಂಬ ಊಹಾಪೋಹಗಳು ಗರಿಗೆದರಿರುವ ನಡುವೆಯೇ, ತಮಿಳುನಾಡಿನ ಆಡಳಿತಾರೂಢ ತಮಿಳಗ ವೆಟ್ರಿ ಕಳಗಂ (ಟಿವಿಕೆ) ಈ ಬೆಳವಣಿಗೆಯನ್ನು ಮುಕ್ತವಾಗಿ ಸ್ವಾಗತಿಸಿದೆ. ತಮಿಳುನಾಡು ಮುಖ್ಯಮಂತ್ರಿ ಜೋಸೆಫ್ ವಿಜಯ್ ಅವರು ಬೆಳ್ಳಿತೆರೆಯಿಂದ ಮುಖ್ಯಮಂತ್ರಿ ಹುದ್ದೆಗೆ ಏರಿದ ಪಯಣವು ರಾಜಕೀಯ ಪ್ರವೇಶ ಬಯಸುವ ಯಾವುದೇ ನವೋದ್ಯಮಿಗಳಿಗೆ ದೊಡ್ಡ ಸ್ಫೂರ್ತಿಯಾಗಿದೆ ಎಂದು ಟಿವಿಕೆ ಬಣ್ಣಿಸಿದೆ.
ಕೊಯಮತ್ತೂರಿನಲ್ಲಿ ಸುಮಾರು 3,000ಕ್ಕೂ ಹೆಚ್ಚು ಪದಾಧಿಕಾರಿಗಳು ಭಾಗವಹಿಸಿದ್ದ ಬೃಹತ್ ಸಮಾವೇಶದಲ್ಲಿ ಧನುಷ್ ಅವರ ಅಧಿಕೃತ ಅಭಿಮಾನಿ ಸಂಘವನ್ನು “ಧನುಷ್ ನರಪಾಣಿ ಇಯಕ್ಕಂ” ಎಂದು ಅಧಿಕೃತವಾಗಿ ಮರುನಾಮಕರಣ ಮಾಡಲಾಗಿದೆ. ಶಿಸ್ತು, ಸಾಮಾಜಿಕ ಕಳಕಳಿ ಮತ್ತು ಸಮಾಜಸೇವೆಗೆ ಒತ್ತು ನೀಡಿದ ಈ ಸಭೆಯಲ್ಲಿ ಧನುಷ್ ಖುದ್ದು ಹಾಜರಿರದಿದ್ದರೂ, ಅಭಿಮಾನಿ ಸಂಘವನ್ನು ಜನಸೇವಾ ಸಂಘಟನೆಯಾಗಿ ಬದಲಾಯಿಸಿದ ರೀತಿ ತಮಿಳುನಾಡು ರಾಜಕೀಯದಲ್ಲಿ ಹೊಸ ಲೆಕ್ಕಾಚಾರ ಹುಟ್ಟುಹಾಕಿದೆ.
ಟಿವಿಕೆ ವಕ್ತಾರ ಎಂ. ಸತ್ಯ ಕುಮಾರ್ ಹೇಳಿದ್ದೇನು?
ಎನ್‌ಡಿಟಿವಿ ಜೊತೆ ಮಾತನಾಡಿದ ಟಿವಿಕೆ ವಕ್ತಾರ ಎಂ. ಸತ್ಯ ಕುಮಾರ್, ಧನುಷ್ ಅವರ ಸಂಘಟನಾ ಹೆಜ್ಜೆಯನ್ನು ಶ್ಲಾಘಿಸುತ್ತಲೇ ರಾಜಕೀಯದ ಕಠಿಣ ವಾಸ್ತವಗಳ ಕುರಿತು ಎಚ್ಚರಿಕೆ ನೀಡಿದ್ದಾರೆ. ನಮ್ಮ ಪಕ್ಷದ ಯಶಸ್ವಿ ರಾಜಕೀಯ ಪಯಣವು ಬೇರೆಯವರಿಗೂ ಹೊಸದಾಗಿ ರಾಜಕೀಯಕ್ಕೆ ಬರಲು ಸ್ಫೂರ್ತಿ ನೀಡುತ್ತಿರುವುದು ಹೆಮ್ಮೆಯ ಸಂಗತಿ ಎಂದರು.
ಇದನ್ನೂ ಓದಿ: ಓಡಿಬಂದು ನಟ ಅಜಿತ್ನನ್ನು ತಬ್ಬಿಕೊಂಡ ತಮಿಳುನಾಡು ಸಿಎಂ ವಿಜಯ್; ಫ್ಯಾನ್ಸ್ ಫಿದಾ
ವಿಜಯ್ ಅವರ 30 ವರ್ಷಗಳ ತಪಸ್ಸು: ಸಿಎಂ ವಿಜಯ್ ಅವರ ಹಾದಿ ಒಂದು ಮಾದರಿಯಾಗಿ ಕಾಣಿಸಬಹುದು, ಆದರೆ ಅದನ್ನು ಅನುಕರಿಸುವುದು ಅಷ್ಟು ಸುಲಭವಲ್ಲ. ವಿಜಯ್ ಇದಕ್ಕಾಗಿ ಬರೋಬ್ಬರಿ 30-33 ವರ್ಷಗಳ ಕಾಲ ತಳಮಟ್ಟದಿಂದ ಜನಸೇವೆ ಮಾಡುತ್ತಾ ಕೆಲಸ ಮಾಡಿದ್ದಾರೆ. ಅವರೊಂದಿಗೆ ಆರಂಭದಿಂದ ನಿಂತಿದ್ದ ಸಾಮಾನ್ಯ ಅಭಿಮಾನಿ ಸಂಘದ ಪದಾಧಿಕಾರಿಗಳು ಇಂದು ಸಚಿವರಾಗಿದ್ದಾರೆ ಎಂದರು.
ಪೂರ್ಣಾವಧಿ ಬದ್ಧತೆ ಅಗತ್ಯ: ರಾಜಕೀಯ ಪಕ್ಷ ಕಟ್ಟುವುದು ಮತ್ತು ಚುನಾವಣೆ ಗೆಲ್ಲುವುದು ಪಾರ್ಟ್-ಟೈಮ್ ಕೆಲಸವಲ್ಲ. ವಿಜಯ್ ಚಿತ್ರರಂಗದ ಉತ್ತುಂಗದಲ್ಲಿದ್ದಾಗಲೇ ನಟನೆಯನ್ನು ಸಂಪೂರ್ಣವಾಗಿ ತ್ಯಜಿಸಿ ಸಾರ್ವಜನಿಕ ಸೇವೆಗೆ ಧುಮುಕಿದರು. ಅಂತಹ ಕಠಿಣ ನಿರ್ಧಾರ ಹಾಗೂ ಪೂರ್ಣಾವಧಿ ಬದ್ಧತೆ ಪ್ರತಿಯೊಬ್ಬರಿಗೂ ಮುಖ್ಯವಾಗುತ್ತದೆ ಎಂದು ಒತ್ತಿ ಹೇಳಿದರು.
ವಿಜಯ್ ಮತ್ತು ಧನುಷ್ ಹೆಜ್ಜೆಗಳ ನಡುವಿನ ಹೋಲಿಕೆ:
ವಿಜಯ್ ಅವರು ನೇರ ರಾಜಕೀಯ ಪಕ್ಷ (ಟಿವಿಕೆ) ಸ್ಥಾಪಿಸುವ ಮುನ್ನ ತಮ್ಮ ಅಭಿಮಾನಿ ಬಳಗವನ್ನು ‘ವಿಜಯ್ ಮಕ್ಕಳ್ ಇಯಕ್ಕಂ’ (ಕಲ್ಯಾಣ ಸಂಘಟನೆ) ಎಂದು ಬದಲಾಯಿಸಿ, ಉಚಿತ ಆಹಾರ ಕೇಂದ್ರಗಳು, ವಿದ್ಯಾರ್ಥಿ ಗ್ರಂಥಾಲಯಗಳು ಮತ್ತು ಕಾನೂನು ನೆರವು ಶಿಬಿರಗಳ ಮೂಲಕ ತಳಮಟ್ಟದ ಜಾಲವನ್ನು ಸೃಷ್ಟಿಸಿಕೊಂಡಿದ್ದರು. ಈಗ ಧನುಷ್ ಕೂಡ ತಮ್ಮ ಅಭಿಮಾನಿ ಕ್ಲಬ್‌ಗಳನ್ನು ಕೇವಲ ಸಿನಿಮಾ ಕಟೌಟ್, ಹಾಲಿನ ಅಭಿಷೇಕಕ್ಕೆ ಸೀಮಿತಗೊಳಿಸದೆ ‘ಕಲ್ಯಾಣ ಚಳವಳಿ’ಯಾಗಿ ಬದಲಾಯಿಸುತ್ತಿರುವುದು ವಿಜಯ್ ಹೆಜ್ಜೆಯನ್ನೇ ನೆನಪಿಸುತ್ತಿದೆ. ಕೊಯಮತ್ತೂರು ಸಮಾವೇಶದಲ್ಲಿ ಮಾಜಿ ಸಂಸದ ರಬಿ ಬರ್ನಾರ್ಡ್ ಹಾಗೂ ಇಸ್ರೋ ವಿಜ್ಞಾನಿಗಳು ಭಾಗವಹಿಸಿ ಶಿಸ್ತುಬದ್ಧ ಸಂಘಟನೆಯ ಕುರಿತು ಮಾರ್ಗದರ್ಶನ ನೀಡಿರುವುದು ಗಮನಾರ್ಹ.
ತಮಿಳುನಾಡಿನ ಸಿನಿಮಾ-ರಾಜಕೀಯ ನಂಟು: ತಮಿಳುನಾಡು ರಾಜಕೀಯ ಇತಿಹಾಸದಲ್ಲಿ ಚಿತ್ರರಂಗ ಮತ್ತು ಅಧಿಕಾರ ಬೆಸೆದುಕೊಂಡಿದೆ. ಸಿ.ಎನ್. ಅಣ್ಣಾದೊರೈ ಮತ್ತು ಎಂ. ಕರುಣಾನಿಧಿ ಚಿತ್ರಕಥೆಗಳ ಮೂಲಕ ದ್ರಾವಿಡ ಚಳವಳಿ ರೂಪಿಸಿದರೆ, ಎಂ.ಜಿ. ರಾಮಚಂದ್ರನ್ (ಎಂಜಿಆರ್) ಮತ್ತು ಜೆ. ಜಯಲಲಿತಾ ಬೆಳ್ಳಿಪರದೆಯಿಂದ ನೇರವಾಗಿ ಸಿಎಂ ಗದ್ದುಗೆಗೇರಿದ್ದರು. ನಂತರದ ದಿನಗಳಲ್ಲಿ ವಿಜಯಕಾಂತ್, ಶರತ್‌ಕುಮಾರ್, ಕಮಲ್ ಹಾಸನ್ ಪಕ್ಷ ಕಟ್ಟಿದರೂ ಗದ್ದುಗೆ ಏರಲಾಗಲಿಲ್ಲ, ರಜನಿಕಾಂತ್ ರಾಜಕೀಯಕ್ಕೆ ಬಾರದೆ ಹಿಂದೆ ಸರಿದರು. ಇತ್ತೀಚೆಗೆ ವಿಜಯ್ ಚುನಾವಣಾ ಗೆಲುವು ಸಾಧಿಸಿ ಮುಖ್ಯಮಂತ್ರಿ ಹುದ್ದೆಗೆ ಏರಿ ಹೊಸ ಇತಿಹಾಸ ಬರೆದಿದ್ದಾರೆ.
ನಟ ಧನುಷ್ ಇದುವರೆಗೆ ಯಾವುದೇ ನೇರ ರಾಜಕೀಯ ಪ್ರವೇಶದ ಅಧಿಕೃತ ಹೇಳಿಕೆ ನೀಡಿಲ್ಲ. ಸದ್ಯಕ್ಕೆ ಇದು ಕೇವಲ ಅಭಿಮಾನಿ ಬಳಗದ ಸಾಂಸ್ಥಿಕ ಸಮಾಜಸೇವಾ ಬದಲಾವಣೆಯಾಗಿದ್ದರೂ, ಆಡಳಿತ ಪಕ್ಷವೇ ಇದನ್ನು ಸ್ವಾಗತಿಸಿರುವುದರಿಂದ ತಮಿಳುನಾಡು ರಾಜಕೀಯ ವಲಯದಲ್ಲಿ ತೀವ್ರ ಕುತೂಹಲ ಕೆರಳಿಸಿದೆ.
ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Source: TV9 Kannada Entertainment
