जेवताना चुकून जीभ दातांमध्ये अडकून तिला जखम होणे ही एक सामान्य समस्या आहे. लोक अनेकदा घाईघाईने जेवल्यामुळे किंवा नीट न चावल्यामुळे असे होते असे समजून त्याकडे दुर्लक्ष करतात. जर असे वारंवार होत असेल, तर त्यामागे इतर कारणे असू शकतात. जिभेला वारंवार होणाऱ्या जखमांमुळे वेदना, सूज आणि खाण्यापिण्यास अडचण येऊ शकते. विशेषतः जखम पूर्णपणे बरी होण्यापूर्वीच जर पुन्हा इजा झाली, तर समस्या अधिक गंभीर होऊ शकते.
जीभ हा तोंडाचा एक संवेदनशील भाग आहे. ती चघळणे, गिळणे आणि बोलणे यांमध्ये महत्त्वाची भूमिका बजावते. त्यामुळे जिभेला वारंवार होणाऱ्या दुखापती, वरवर पाहता किरकोळ वाटत असल्या तरी एक गंभीर समस्या ठरू शकतात. जर तुमच्या बाबतीत असे घडत असेल तर त्याचे कारण समजून घेणे आणि गरज भासल्यास डॉक्टरांचा सल्ला घेणे महत्त्वाचे आहे. वारंवार जीभ दातांमध्ये अडकण्याचे एक प्रमुख कारण तुमच्या दातांचा आकार असू शकतो.
जर दाताला टोकदार कडा असेल, दात तुटलेला असेल किंवा फिलिंग व्यवस्थित भरलेले नसेल, तर जीभ त्या भागाला लागून जखमी होऊ शकते. त्याचप्रमाणे दात असमान असल्यास चावताना जीभ वारंवार दातांमध्ये अडकू शकते. अशा परिस्थितीत दंतवैद्याचा सल्ला घेणे उत्तम. तुमचे डॉक्टर दाताला असलेल्या कोणत्याही टोकदार कडा किंवा इतर समस्या ओळखू शकतात आणि उपचारांची शिफारस करू शकतात.
काही लोकांना जिभेला सूज येते. ज्यामुळे ती सामान्यपेक्षा मोठी दिसते. या स्थितीमुळे जेवताना जीभ दातांमध्ये अडकण्याची शक्यता वाढते. जिभेला सूज येणे हे ॲलर्जी, दुखापत, संसर्ग किंवा इतर आरोग्य समस्यांमुळे होऊ शकते. जर जिभेला अचानक सूज आली. त्यामुळे श्वास घेण्यास किंवा गिळण्यास त्रास होत असेल, तर त्वरित वैद्यकीय मदत घ्या. व्हिटॅमिन बी१२, फोलेट किंवा लोहाच्या कमतरतेमुळे जिभेला वेदना, जळजळ किंवा सूज येऊ शकते.
काही प्रकरणांमध्ये, जिभेच्या पृष्ठभागावरही परिणाम होऊ शकतो. जर तुम्हाला सतत जळजळ, असामान्य सूज, थकवा किंवा अशक्तपणा यांसारखी लक्षणे जाणवत असतील, तर डॉक्टरांचा सल्ला घेणे उत्तम. कधीकधी, जेवताना बोलल्यामुळे, खूप घाईने चावल्यामुळे किंवा अन्नाकडे पुरेसे लक्ष न दिल्यामुळे जीभ दातांमध्ये अडकते. जर असे अधूनमधून होत असेल, तर जेवण्याचा वेग कमी केल्यास आणि अन्न व्यवस्थित चावल्यास मदत होऊ शकते. जर दातांच्या रचनेत किंवा चावण्याच्या पद्धतीत काही समस्या असतील, तर त्यांची तपासणी करून घेणे महत्त्वाचे आहे.
जेवताना तुमच्या जिभेला किरकोळ जखम झाल्यास प्रथम स्वच्छ पाण्याने हळुवारपणे तोंड धुवा. रक्तस्त्राव होत असल्यास स्वच्छ कापसाच्या बोळ्याने किंवा कापडाने जखमेवर हळुवार आणि स्थिर दाब द्या. काही काळ खूप गरम, मसालेदार किंवा आंबट पदार्थ खाणे टाळा, कारण त्यामुळे जळजळ वाढू शकते. रक्तस्त्राव सुरूच राहिल्यास जखम खोल असल्यास जीभ खूप सुजली असल्यास किंवा गिळण्यास त्रास होत असल्यास ताबडतोब डॉक्टरांचा सल्ला घ्या.
Source: TV9 Marathi Health
