ನ್ಯೂಜಿಲೆಂಡ್ ವಿರುದ್ಧದ ಮೂರನೇ ಟಿ20 ಪಂದ್ಯದಲ್ಲಿ ಟೀಂ ಇಂಡಿಯಾದ ಗೆಲುವಿನಲ್ಲಿ ಅಭಿಷೇಕ್ ಶರ್ಮಾ ಮತ್ತು 15 ವರ್ಷದ ವೈಭವ್ ಸೂರ್ಯವಂಶಿ ಪ್ರಮುಖ ಪಾತ್ರವಹಿಸಿದರು. ಈ ಇಬ್ಬರ ಅಬ್ಬರದ ಬ್ಯಾಟಿಂಗ್ ನೆರವಿನಿಂದ ಭಾರತ ಆರು ವಿಕೆಟ್‌ಗಳ ಭರ್ಜರಿ ಗೆಲುವು ಸಾಧಿಸಿದ್ದು, ಐದು ಪಂದ್ಯಗಳ ಟಿ20 ಸರಣಿಯಲ್ಲಿ 3-0 ಮುನ್ನಡೆಯೊಂದಿಗೆ ಸರಣಿಯನ್ನು ಕೈವಶ ಮಾಡಿಕೊಂಡಿದೆ. ಹೀಗಾಗಿ ಪಂದ್ಯದ ಬಳಿಕ ಮಾತನಾಡಿದ ಶ್ರೇಯಸ್ ಅಯ್ಯರ್, ಅಭಿಷೇಕ್ ಮತ್ತು ವೈಭವ್ ಅವರ ಸ್ಫೋಟಕ ಬ್ಯಾಟಿಂಗ್‌ಗೆ ಮನಸೋತಿದ್ದು, ಇವರಿಬ್ಬರ ಪ್ರದರ್ಶನವನ್ನು ಅದ್ಭುತ ಎಂದು ಬಣ್ಣಿಸಿದ್ದಾರೆ.
ಈ ಪಂದ್ಯದಲ್ಲಿ ಅಭಿಷೇಕ್ ಶರ್ಮಾ ಕೇವಲ 38 ಎಸೆತಗಳಲ್ಲಿ 11 ಸಿಕ್ಸರ್‌ ಮತ್ತು 9 ಬೌಂಡರಿಗಳ ನೆರವಿನಿಂದ 113 ರನ್ ಸಿಡಿಸಿದರು. ಮತ್ತೊಂದೆಡೆ, ವೈಭವ್ ಸೂರ್ಯವಂಶಿ ಕೇವಲ 19 ಎಸೆತಗಳಲ್ಲಿ 45 ರನ್ ಗಳಿಸಿದರು. ಇವರಿಬ್ಬರ ಸ್ಫೋಟಕ ಬ್ಯಾಟಿಂಗ್ ನೆರವಿನಿಂದ ಭಾರತ 199 ರನ್‌ಗಳ ಗುರಿಯನ್ನು ಕೇವಲ 13.2 ಓವರ್‌ಗಳಲ್ಲಿ ಬೆನ್ನಟ್ಟಿ ಗೆಲುವು ಸಾಧಿಸಿತು.
ನಾನು ನೋಡೇ ಇಲ್ಲ; ಅಯ್ಯರ್
ಪಂದ್ಯದ ಬಳಿಕ ಮಾತನಾಡಿದ ಶ್ರೇಯಸ್ ಅಯ್ಯರ್ ಬಳಿ, ತಾವು ಕಂಡ ಅತ್ಯುತ್ತಮ ಬ್ಯಾಟಿಂಗ್ ಪ್ರದರ್ಶನಗಳಲ್ಲಿ ಇದಕ್ಕೆ ಯಾವ ಸ್ಥಾನ ನೀಡುತ್ತೀರಿ ಎಂಬ ಪ್ರಶ್ನೆ ಕೇಳಲಾಯಿತು. ಇದಕ್ಕೆ ಉತ್ತರಿಸಿದ ಅಯ್ಯರ್, ‘ಈ ಇಬ್ಬರ ರನ್ ಗಳಿಕೆಯ ವೇಗ ಅಂತರರಾಷ್ಟ್ರೀಯ ಕ್ರಿಕೆಟ್‌ನಲ್ಲೂ ಅಸಾಧಾರಣವಾದದ್ದು. ನಿಜ ಹೇಳಬೇಕೆಂದರೆ, ಐದು ಓವರ್‌ಗಳಲ್ಲಿ 100 ರನ್ ಗಳಿಸುವುದನ್ನು ನಾನು ಹಿಂದೆಂದೂ ನೋಡಿಲ್ಲ. ಅದರಲ್ಲೂ ಅಂತರರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಇಂತಹ ಪ್ರದರ್ಶನ ಅಪರೂಪ. ನಾನು ನೋಡಿದ ಅತ್ಯುತ್ತಮ ಬ್ಯಾಟಿಂಗ್ ಪ್ರದರ್ಶನಗಳಲ್ಲಿ ಇದು ಖಂಡಿತವಾಗಿಯೂ ಅಗ್ರಸ್ಥಾನದಲ್ಲಿರುತ್ತದೆ ಎಂದು ಅಯ್ಯರ್ ಮೆಚ್ಚುಗೆ ವ್ಯಕ್ತಪಡಿಸಿದರು.
ಭಾರತದ ಇನ್ನಿಂಗ್ಸ್ ಆರಂಭವೇ ಬಿರುಗಾಳಿಯಂತಿತ್ತು. ನ್ಯೂಜಿಲೆಂಡ್ ವೇಗಿ ಜೇಕಬ್ ಡಫಿ ಎಸೆದ ಮೊದಲ ಓವರ್‌ನಲ್ಲೇ ಅಭಿಷೇಕ್ ಮತ್ತು ವೈಭವ್ ಬರೋಬ್ಬರಿ 26 ರನ್ ಕಲೆಹಾಕಿದರು. ಆ ಬಳಿಕವೂ ಅಬ್ಬರ ಮುಂದುವರಿಸಿದ ಈ ಜೋಡಿ, ಕೇವಲ ಮೂರು ಓವರ್‌ಗಳಲ್ಲಿ ವಿಕೆಟ್ ನಷ್ಟವಿಲ್ಲದೆ 64 ರನ್ ಗಳಿಸಿತು. ಪವರ್‌ಪ್ಲೇ ಮುಕ್ತಾಯದ ವೇಳೆಗೆ ಭಾರತದ ಸ್ಕೋರ್ ವಿಕೆಟ್ ನಷ್ಟವಿಲ್ಲದೆ 118 ರನ್‌ಗಳಿಗೆ ತಲುಪಿತ್ತು.
ಅಭಿಷೇಕ್ ಕೇವಲ 15 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದರು. ಬಳಿಕ 35 ಎಸೆತಗಳಲ್ಲೇ ಶತಕ ಗಳಿಸಿ ಎದುರಾಳಿ ಬೌಲರ್‌ಗಳನ್ನು ಕಂಗೆಡಿಸಿದರು. ಎಂಟನೇ ಓವರ್‌ನಲ್ಲಿ ಮ್ಯಾಥ್ಯೂ ಫಿಶರ್ ಬೌಲಿಂಗ್‌ನಲ್ಲಿ ವೈಭವ್ 45 ರನ್‌ಗಳಿಗೆ ಔಟಾದರೂ, ಅಭಿಷೇಕ್ ಸಂಜು ಸ್ಯಾಮ್ಸನ್ ಜೊತೆಗೂಡಿ ಭಾರತದ ಗೆಲುವನ್ನು ಸುಲಭಗೊಳಿಸಿದರು.
ವಿದೇಶಿ ನೆಲದಲ್ಲೂ ಭಾರತದ ಅಬ್ಬರ
ವಿದೇಶಿ ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳುವುದು ಸವಾಲಿನ ಸಂಗತಿಯಾದರೂ, ಭಾರತೀಯ ಆಟಗಾರರು ತೋರಿದ ಪ್ರದರ್ಶನ ಶ್ಲಾಘನೀಯ ಎಂದಿರುವ ಅಯ್ಯರ್, ‘ವಿದೇಶದಲ್ಲಿ ಆಡುವಾಗ ಅಲ್ಲಿನ ಪರಿಸ್ಥಿತಿಗಳು ವಿಭಿನ್ನವಾಗಿರುತ್ತವೆ. ಬೇರೆ ರೀತಿಯ ಎಸೆತಗಳನ್ನು ಎದುರಿಸಬೇಕಾಗುತ್ತದೆ. ಇಂತಹ ಸವಾಲುಗಳನ್ನು ಮೀರಿ ಈ ರೀತಿಯ ಅದ್ಭುತ ಪ್ರದರ್ಶನ ನೀಡಿರುವುದು ಮೆಚ್ಚುವಂತಹದ್ದು. ಇಂದು ಅವರು ಆಡಿದ ರೀತಿ ನಿಜಕ್ಕೂ ಅಸಾಧಾರಣವಾಗಿತ್ತು. ಇನ್ನೂ ಎರಡು ಪಂದ್ಯಗಳು ಬಾಕಿ ಇರುವಾಗಲೇ ಮೂರನೇ ಪಂದ್ಯದಲ್ಲಿ ಸರಣಿ ಗೆದ್ದಿರುವುದು ಸಂತಸದ ವಿಚಾರ. ಇದೇ ಫಾರ್ಮ್‌ ಅನ್ನು ಆಟಗಾರರು ಮುಂದುವರಿಸಲಿ ಎಂದು ಆಶಿಸುತ್ತೇನೆ. ಆರಂಭದಲ್ಲಿ ಜೆಟ್‌ಲಾಗ್‌ನಂತಹ ಸಮಸ್ಯೆಗಳಿದ್ದರೂ, ಪಂದ್ಯಕ್ಕೆ ಹೊಂದಿಕೊಂಡು ಅವರು ಆಡಿದ ರೀತಿ ನಂಬಲಸಾಧ್ಯವಾದದ್ದು ಎಂದಿದ್ದಾರೆ.
‘ನನ್ನ ದಾಖಲೆ ಮುರಿಯಲು ಇನ್ನೂ ಆಗಿಲ್ಲ ಅಲ್ವಾ?’; ಅಭಿಷೇಕ್‌ಗೆ ಯುವರಾಜ್ ಟಾಂಗ್!
ಯಾರ್ಕರ್‌ಗಳನ್ನು ಎಸೆಯುವಂತೆ ಸೂಚಿಸಿದೆ
ಇನ್ನು ನ್ಯೂಜಿಲೆಂಡ್ ಬ್ಯಾಟರ್‌ಗಳು ಮುಕ್ತವಾಗಿ ರನ್ ಗಳಿಸುತ್ತಿದ್ದ ಸಂದರ್ಭದಲ್ಲಿ ಭಾರತ ತಂಡ ಯಾರ್ಕರ್‌ಗಳನ್ನು ಅಸ್ತ್ರವಾಗಿ ಬಳಸಲು ನಿರ್ಧರಿಸಿದ್ದೇಕೆ ಎಂಬುದನ್ನು ವಿವರಿಸಿದ ಅಯ್ಯರ್, ‘10 ಓವರ್‌ಗಳ ಬಳಿಕ ಅವರು ಯಾವುದೇ ರೀತಿಯ ಎಸೆತಗಳನ್ನು ಬಾರಿಸುತ್ತಿದ್ದರು. ಹೀಗಾಗಿ ಸಾಧ್ಯವಾದಷ್ಟು ಯಾರ್ಕರ್‌ಗಳನ್ನು ಎಸೆಯುವಂತೆ ಬೌಲರ್‌ಗಳಿಗೆ ಸೂಚಿಸಿದೆ. ಆರು ಎಸೆತಗಳನ್ನೂ ಯಾರ್ಕರ್ ಎಸೆದರೂ ಪರವಾಗಿಲ್ಲ, ಬ್ಯಾಟರ್‌ಗಳನ್ನು ನೇರವಾಗಿ ಹೊಡೆಯುವಂತೆ ಮಾಡಬೇಕು ಅಥವಾ ವೈಡ್ ಯಾರ್ಕರ್‌ಗಳನ್ನು ಬಳಸಬೇಕು ಎಂದು ಹೇಳಿದ್ದೆವು. ಅದರಂತೆ ನಮ್ಮ ಯೋಜನೆಯನ್ನು ಸಮರ್ಥವಾಗಿ ಕಾರ್ಯಗತಗೊಳಿಸಲು ಸಾಧ್ಯವಾಯಿತು. ರನ್ ಗಳಿಕೆಯ ವೇಗವನ್ನು ಪ್ರತಿ ಓವರ್‌ಗೆ 8ರಿಂದ 9 ರನ್‌ಗಳಿಗೆ ಇಳಿಸಲು ಸಾಧ್ಯವಾಯಿತು. ಎದುರಾಳಿಯನ್ನು 200 ರನ್‌ಗಳೊಳಗೆ ನಿಯಂತ್ರಿಸುವುದೇ ನಮ್ಮ ಗುರಿಯಾಗಿತ್ತು ಎಂದಿದ್ದಾರೆ.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Source: TV9 Kannada Sports
