नागपूर पदवीधर निवडणुकीत मोठा उलटफेर होत काँग्रेसचे अभिजित वंजारी विजयी झाले आहेत. त्यामुळे काँग्रेसचे कार्यकर्त्यांनी भाजपाच्या विरोधात घोषणाबाजी करुन वातावरण दणाणून सोडले आहे. त्यांनी भाजपच्या सुधाकर कोहळे यांचा पराभव केला आहे. महाविकास आघाडीला आता पाच निवडणूकांपैकी तीन ठिकाणी विजय मिळाला आहे.
महाराष्ट्र विधान परिषदेच्या ३ पदवीधर आणि २ शिक्षक मतदारसंघांच्या निवडणुकीचे निकाल जाहीर होत आहेत. एकूण पाच जागांसाठी १८२ उमेदवार निवडणूकीच्या रिंगणात उभे आहे. पुणे, छत्रपती संभाजीनगर , नागपूर विभागातील पदवीधर मतदार संघ, तसेच अमरावती आणि पुणे विभागातील शिक्षक मतदार संघासाठी ही निवडणूक होत आहे.
नागपूर पदवीधर मतदार संघात एकूण ३८ उमेदवार रिंगणात उभे होते. मुख्य लढत भाजपच्या सुधाकर कोहळे आणि काँग्रेसच्या अभिजित वंजारी यांच्यात होती. सुमारे सहा दशकांच्या वर्चस्वानंतर २०२० मध्ये काँग्रेसने हिसकावलेली जागा पुन्हा मिळवण्याचा प्रयत्न भाजप करीत होता. या निवडणुकीत गेल्या निवडणुकीचे विजेते काँग्रेसचे अभिजित वंजारी यांनी मतात पुन्हा आघाडी घेतली आणि त्यानंतर काँग्रेस कार्यकर्त्यांनी विजयाचा जल्लाेष सुरु केला. भाजपाच्या सुधाकर कोहळे यांनी आपला पराभव मान्य केला आहे.
हा विजय म्हणजे शक्ती पेक्षा युक्ती श्रेष्ठ
जो जिता वो सिंकदर, हा विजय म्हणजे शक्ती पेक्षा युक्ती श्रेष्ठ आहे. अजूनही लीड सुरु आहे. पसंतीचे मतदान असल्याने याचा फायदा झाला. सर्वांचे आम्हाला सहकार्य मिळाले असे विजयी उमेदवार अभिजीत वंजारी यांनी म्हटले आहे. आम्ही आमदार म्हणून विधान परिषदेत जे मुद्दे काढले त्याला मिळालेला हा पाठिंबा आहे असेही त्यांनी म्हटले आहे.
Source: TV9 Marathi National
