ಆಸ್ಟ್ರೇಲಿಯಾ ಕ್ರಿಕೆಟ್ ಇತಿಹಾಸಕ್ಕೆ ಕಪ್ಪುಚುಕ್ಕೆಯಾಗಿರುವ 2018ರ ‘ಸ್ಯಾಂಡ್‌ಪೇಪರ್‌ಗೇಟ್’ (ಚೆಂಡು ವಿರೂಪ ಪ್ರಕರಣ) ವಿವಾದ ಎಂಟು ವರ್ಷಗಳ ಬಳಿಕ ಮತ್ತೆ ಭುಗಿಲೆದ್ದಿದೆ. ಮಾಜಿ ಆರಂಭಿಕ ಆಟಗಾರ ಡೇವಿಡ್ ವಾರ್ನರ್ ಅವರು ಆಸ್ಟ್ರೇಲಿಯಾ ಕ್ರಿಕೆಟ್ ಮಂಡಳಿ (CA) ಮತ್ತು ತಂಡದ ಪ್ರಮುಖ ಬೌಲರ್‌ಗಳ ವಿರುದ್ಧ ಗಂಭೀರ ಆರೋಪ ಮಾಡುವ ಮೂಲಕ ಕ್ರಿಕೆಟ್ ಜಗತ್ತಿನಲ್ಲಿ ಹೊಸ ಸಂಚಲನ ಮೂಡಿಸಿದ್ದಾರೆ.
ಏನಿದು ವಾರ್ನರ್ ಅವರ ಹೊಸ ಆರೋಪ?
2026ರ ನವೆಂಬರ್ 14ರಂದು ಇನ್‌ಸ್ಟಾಗ್ರಾಮ್‌ನಲ್ಲಿ ಸುದೀರ್ಘ ಪೋಸ್ಟ್ ಹಂಚಿಕೊಂಡಿರುವ ಡೇವಿಡ್ ವಾರ್ನರ್, 2018ರ ವಿವಾದದ ಕುರಿತು ಕ್ರಿಕೆಟ್ ಆಸ್ಟ್ರೇಲಿಯಾ ನಡೆಸಿದ ತನಿಖೆಯನ್ನೇ ಪ್ರಶ್ನಿಸಿದ್ದಾರೆ. ತಮ್ಮ ಮಾಹಿತಿಯ ಪ್ರಕಾರ, ತನಿಖೆಯ ಸಮಯದಲ್ಲಿ ಮಂಡಳಿಯು ತಂಡದ ಪ್ರಮುಖ ಬೌಲರ್‌ಗಳಾದ ಜೋಶ್ ಹೇಝಲ್‌ವುಡ್, ಮಿಚೆಲ್ ಸ್ಟಾರ್ಕ್ ಮತ್ತು ನಾಥನ್ ಲಿಯಾನ್ ಅವರನ್ನು ಒಮ್ಮೆಯೂ ವಿಚಾರಣೆಗೆ ಒಳಪಡಿಸಿಲ್ಲ ಎಂದು ವಾರ್ನರ್ ಬಾಂಬ್ ಸಿಡಿಸಿದ್ದಾರೆ.
“ಬೌಲರ್‌ಗಳನ್ನು ವಿಚಾರಣೆಯನ್ನೇ ನಡೆಸದಿದ್ದ ಮೇಲೆ, ಚೆಂಡು ವಿರೂಪಗೊಳಿಸುವ ಸಂಚಿನ ಬಗ್ಗೆ ಅವರಿಗೆ ಏನೂ ತಿಳಿದಿರಲಿಲ್ಲ ಎಂದು ಮಂಡಳಿ ಹೇಗೆ ತೀರ್ಮಾನಿಸಿತು?” ಎಂದು ಪ್ರಶ್ನಿಸಿದ್ದಾರೆ. ಕ್ರಿಕೆಟ್ ಆಸ್ಟ್ರೇಲಿಯಾ ಮೊದಲೇ ಯಾರನ್ನು ಬಲಿಪಶು ಮಾಡಬೇಕೆಂದು ನಿರ್ಧರಿಸಿ, ಕಳಪೆ ತನಿಖೆಯ ಮೂಲಕ ಇಡೀ ಪ್ರಕರಣವನ್ನು ಮುಚ್ಚಿಹಾಕುವ ಪ್ರಯತ್ನ ಮಾಡಿದೆ ಎಂದು ಡೇವಿಡ್ ವಾರ್ನರ್ ನೇರವಾಗಿ ಆರೋಪಿಸಿದ್ದಾರೆ.
ವಿವಾದ ಮತ್ತೆ ಭುಗಿಲೇಳಲು ಕಾರಣವೇನು?
ಇತ್ತೀಚೆಗೆ ಬಿಡುಗಡೆಯಾದ ಆಸ್ಟ್ರೇಲಿಯಾ ಆಟಗಾರ ಉಸ್ಮಾನ್ ಖ್ವಾಜಾ ಅವರ ಆತ್ಮಚರಿತ್ರೆ ‘ಸಬ್ರ್’ (Sabr) ನಲ್ಲಿ ಚೆಂಡು ವಿರೂಪದ ಪ್ರಕರಣದ ಬಗ್ಗೆ ಉಲ್ಲೇಖಿಸಲಾಗಿದೆ. ಆ ಘಟನೆಯ ಬಗ್ಗೆ ಕೇವಲ ನಿಷೇಧಕ್ಕೊಳಗಾದ ಮೂವರು ಆಟಗಾರರಿಗೆ ಮಾತ್ರವಲ್ಲ, ತಂಡದ ಇತರರಿಗೂ ತಿಳಿದಿತ್ತು ಮತ್ತು ಹಿಂದಿನ ಟೆಸ್ಟ್ ಪಂದ್ಯದಲ್ಲೂ ಸ್ಯಾಂಡ್‌ಪೇಪರ್ ಬಳಸಲಾಗಿತ್ತು ಎಂದು ಖ್ವಾಜಾ ತಮ್ಮ ಪುಸ್ತಕದಲ್ಲಿ ಬರೆದುಕೊಂಡಿದ್ದಾರೆ. ಅಲ್ಲದೆ, ಇಡೀ ತಂಡ ಈ ಘಟನೆಯ ನೈತಿಕ ಹೊಣೆ ಹೊರಬೇಕಿತ್ತು ಎಂದೂ ಅವರು ಅಭಿಪ್ರಾಯಪಟ್ಟಿದ್ದಾರೆ.
ಉಸ್ಮಾನ್ ಖ್ವಾಜಾ ಅವರ ಈ ಹೇಳಿಕೆಗಳನ್ನು ಆಸ್ಟ್ರೇಲಿಯಾ ಟೆಸ್ಟ್ ನಾಯಕ ಪ್ಯಾಟ್ ಕಮಿನ್ಸ್ ಮತ್ತು ವೇಗಿ ಮಿಚೆಲ್ ಸ್ಟಾರ್ಕ್ ಸಾರಾಸಗಟಾಗಿ ತಳ್ಳಿಹಾಕಿದ್ದರು. ಕಮಿನ್ಸ್ ಇದನ್ನು “ಸಂಪೂರ್ಣ ಅಸಂಬದ್ಧ” ಎಂದಿದ್ದರೆ, ಸ್ಟಾರ್ಕ್ 2021ರಲ್ಲಿ ತಾವು ಮತ್ತು ಇತರ ಬೌಲರ್‌ಗಳು ನೀಡಿದ್ದ ಜಂಟಿ ಹೇಳಿಕೆಗೆ ಬದ್ಧರಾಗಿರುವುದಾಗಿ ತಿಳಿಸಿದ್ದರು. ಇದರ ಬೆನ್ನಲ್ಲೇ ಖ್ವಾಜಾ ಬೆಂಬಲಕ್ಕೆ ನಿಂತ ವಾರ್ನರ್, ಕಮಿನ್ಸ್ ವಿರುದ್ಧ ಕಿಡಿಕಾರಿದ್ದಲ್ಲದೆ ಈಗ ತನಿಖೆಯ ಪಾರದರ್ಶಕತೆಯನ್ನೇ ಪ್ರಶ್ನಿಸಿದ್ದಾರೆ.
2018ರ ‘ಸ್ಯಾಂಡ್‌ಪೇಪರ್‌ಗೇಟ್’ ಹಿನ್ನೆಲೆ:
2018ರ ಮಾರ್ಚ್‌ನಲ್ಲಿ ಸೌತ್ ಆಫ್ರಿಕಾ ವಿರುದ್ಧದ ಕೇಪ್ ಟೌನ್ ಟೆಸ್ಟ್ ಪಂದ್ಯದ ವೇಳೆ ಆಸ್ಟ್ರೇಲಿಯಾ ಆಟಗಾರ ಕ್ಯಾಮರೋನ್ ಬ್ಯಾಂಕ್ರಾಫ್ಟ್ ಚೆಂಡಿನ ಸ್ಥಿತಿಯನ್ನು ಬದಲಿಸಲು ಹಳದಿ ಬಣ್ಣದ ಸ್ಯಾಂಡ್‌ಪೇಪರ್ (ಮರಳು ಕಾಗದ) ಬಳಸಿದ್ದು ಕ್ಯಾಮೆರಾ ಕಣ್ಣಿಗೆ ಬಿದ್ದಿತ್ತು. ಈ ಘಟನೆ ಇಡೀ ವಿಶ್ವ ಕ್ರಿಕೆಟ್‌ನಲ್ಲಿ ಭಾರಿ ಆಕ್ರೋಶಕ್ಕೆ ಕಾರಣವಾಗಿತ್ತು.
ಆ ಬಳಿಕ ತನಿಖೆ ನಡೆಸಿದ್ದ ಕ್ರಿಕೆಟ್ ಆಸ್ಟ್ರೇಲಿಯಾ, ಅಂದಿನ ನಾಯಕ ಸ್ಟೀವ್ ಸ್ಮಿತ್ ಮತ್ತು ಉಪನಾಯಕ ಡೇವಿಡ್ ವಾರ್ನರ್ ಅವರಿಗೆ ತಲಾ 12 ತಿಂಗಳು ಹಾಗೂ ಬ್ಯಾಂಕ್ರಾಫ್ಟ್ ಅವರಿಗೆ 9 ತಿಂಗಳ ನಿಷೇಧ ಹೇರಿತ್ತು. ಆದರೆ, ಚೆಂಡಿನೊಂದಿಗೆ ನೇರ ಸಂಪರ್ಕ ಹೊಂದಿರುವ ಬೌಲರ್‌ಗಳಿಗೆ ಈ ಬಗ್ಗೆ ಯಾವುದೇ ಮಾಹಿತಿ ಇರಲಿಲ್ಲ ಎಂದು ಮಂಡಳಿ ಕ್ಲೀನ್ ಚಿಟ್ ನೀಡಿತ್ತು.
2021ರಲ್ಲಿ ಮಿಚೆಲ್ ಸ್ಟಾರ್ಕ್, ಜೋಶ್ ಹೇಝಲ್‌ವುಡ್, ಪ್ಯಾಟ್ ಕಮಿನ್ಸ್ ಮತ್ತು ನಾಥನ್ ಲಿಯಾನ್ ಜಂಟಿ ಹೇಳಿಕೆ ನೀಡಿ ತಮಗೆ ಈ ಸಂಚಿನ ಬಗ್ಗೆ ತಿಳಿದಿರಲಿಲ್ಲ ಎಂದು ಸ್ಪಷ್ಟಪಡಿಸಿದ್ದರು. ಆದರೆ ಈಗ ಡೇವಿಡ್ ವಾರ್ನರ್ ಮತ್ತು ಉಸ್ಮಾನ್ ಖ್ವಾಜಾ ಅವರ ಸಾಲು ಸಾಲು ಹೇಳಿಕೆಗಳು ಆಸ್ಟ್ರೇಲಿಯಾ ಕ್ರಿಕೆಟ್ ವಲಯದಲ್ಲಿ ಮತ್ತೊಮ್ಮೆ ಬಿರುಕು ಮೂಡಿಸಿದ್ದು, ಹಳೆಯ ತನಿಖೆಯ ಸತ್ಯಾಸತ್ಯತೆಯ ಬಗ್ಗೆ ಹೊಸ ಚರ್ಚೆಗೆ ನಾಂದಿ ಹಾಡಿದೆ.
ಇದನ್ನೂ ಓದಿ: ಬರೋಬ್ಬರಿ 21 ಸಿಕ್ಸ್… ಸಿಡಿಲಬ್ಬರದ ಡಬಲ್ ಸೆಂಚುರಿ ಸಿಡಿಸಿದ ಬೆವನ್ ಜೇಕಬ್ಸ್!
ಒಟ್ಟಿನಲ್ಲಿ, ಎಂಟು ವರ್ಷಗಳ ಹಿಂದೆ ಮುಗಿದುಹೋಗಿದೆ ಎನ್ನಲಾಗಿದ್ದ ‘ಸ್ಯಾಂಡ್‌ಪೇಪರ್‌ಗೇಟ್’ ಅಧ್ಯಾಯಕ್ಕೆ ಉಸ್ಮಾನ್ ಖ್ವಾಜಾ ಅವರ ‘ಸಬ್ರ್’ ಮತ್ತು ಡೇವಿಡ್ ವಾರ್ನರ್ ಅವರ ಈ ಹೊಸ ಬಾಂಬ್ ಮರುಜೀವ ನೀಡಿದೆ. ಅಂದಿನ ತನಿಖೆ ನಿಜಕ್ಕೂ ಪಾರದರ್ಶಕವಾಗಿತ್ತೇ ಅಥವಾ ಕೆಲವರನ್ನು ರಕ್ಷಿಸುವ ತಂತ್ರವಾಗಿತ್ತೇ ಎಂಬ ಪ್ರಶ್ನೆ ಈಗ ಕ್ರಿಕೆಟ್ ವಲಯದಲ್ಲಿ ಮತ್ತೆ ಪ್ರತಿಧ್ವನಿಸುತ್ತಿದೆ. ವಾರ್ನರ್ ಅವರ ಈ ಗಂಭೀರ ಆರೋಪಗಳಿಗೆ ಕ್ರಿಕೆಟ್ ಆಸ್ಟ್ರೇಲಿಯಾ ಮತ್ತು ಹಾಲಿ ಆಟಗಾರರು ಮುಂದೆ ಯಾವ ರೀತಿ ಪ್ರತಿಕ್ರಿಯಿಸಲಿದ್ದಾರೆ ಎಂಬುದು ತೀವ್ರ ಕುತೂಹಲ ಮೂಡಿಸಿದೆ.
Source: TV9 Kannada Sports
