राज्याच्या मंत्रिमंडळाने गोकुळ निवडणुकीसंदर्भात घेतलेला निर्णय हा लोकशाही संपवणारा आहे, असा गंभीर आरोप काँग्रेस नेते सतेज पाटील यांनी केला आहे. सरकारने तांत्रिक मुद्दा पुढे करत त्यांचे बहुमत नाकारण्याचा प्रयत्न केल्याचे पाटील यांनी म्हटले. हा निर्णय महाराष्ट्राच्या इतिहासातील काळा दिवस म्हणून नोंदवला जाईल, अशी टीका त्यांनी केली. सतेज पाटील यांच्या मते, सरकारने आणलेला अध्यादेश केवळ गोकुळ आणि काही मोजक्या संस्थांना लागू होणार आहे, साखर कारखाने किंवा जिल्हा बँकांना त्यातून वगळण्यात आले आहे.
कोल्हापूरच्या जनतेने दिलेला कौल सरकार नाकारत असून, केवळ सत्ता मिळवण्यासाठी हा प्रयत्न सुरू असल्याचे त्यांनी सांगितले. जवळपास साडेपाच लाख शेतकऱ्यांचा संसार गोकुळवर अवलंबून असताना, सरकारने शेतकऱ्यांनी दिलेला कौल नाकारणे चुकीचे असल्याचे पाटील म्हणाले. या षडयंत्रामागे हसन मुश्रीफ आणि चंद्रकांत पाटील असल्याचा आरोपही सतेज पाटील यांनी केला. निवडणुकीनंतर नियमांमध्ये बदल करून पूर्वलक्षी प्रभावाने कायद्याची अंमलबजावणी करणे हे लोकशाहीविरोधी आहे, असे त्यांनी स्पष्ट केले. राहुल गांधी यांनीही या पॅनलला पाठिंबा दिला असून, त्यांनी सरकारच्या या कृतीवर प्रश्नचिन्ह उपस्थित केले आहे.
Source: TV9 Marathi National
