बाळाचा जन्म म्हणजे कुटुंबात आनंदाची नवी सुरुवात असते. मात्र या आनंदासोबत जबाबदाऱ्या आणि ताणही वाढतात. अपुरी झोप, बाळाची सतत काळजी आणि एकमेकांना वेळ देता न येणे यामुळे पती-पत्नीमध्ये चिडचिड आणि वाद वाढू शकतात. अशा वेळी काही छोट्या गोष्टींची काळजी घेतल्यास नात्यातील प्रेम आणि जवळीक टिकवून ठेवता येते.
बाळाच्या जन्मानंतर आई-वडिलांचे दैनंदिन आयुष्य बदलते. रात्री वारंवार जागे होणे, बाळाला दूध पाजणे आणि त्याला झोपवणे यामुळे दोघांचीही झोप पूर्ण होत नाही. परिणामी, थकवा आणि मानसिक ताण वाढून छोट्या गोष्टींवरूनही वाद होऊ शकतात. अशा वेळी प्रत्येक रागामागे नाराजीच असते असे नाही; कधीकधी त्यामागे केवळ थकवा असतो, हे समजून घेणे महत्त्वाचे आहे.
बाळाची जबाबदारी दोघांनीही घ्या
बाळाच्या संगोपनाची बहुतांश जबाबदारी एकाच जोडीदारावर पडल्यास नाराजी वाढू शकते. त्यामुळे बाळाला झोपवणे, त्याची काळजी घेणे आणि घरातील कामे शक्य तितकी दोघांनी वाटून घ्यावीत. गरज पडल्यास कुटुंबीयांची मदत घ्यावी. एकमेकांच्या अडचणी समजून घेतल्याने तणाव कमी होण्यास मदत होते.
बाळाच्या संगोपनात व्यस्त झाल्यामुळे पती-पत्नींना एकमेकांशी मनमोकळ्या गप्पा मारण्यासाठी वेळ मिळत नाही. त्यामुळे भावनिक अंतर वाढू शकते. दिवसातून काही मिनिटे तरी एकमेकांसाठी राखून ठेवा. आपल्या भावना, अडचणी आणि अपेक्षा शांतपणे व्यक्त करा तसेच जोडीदाराचे म्हणणेही लक्षपूर्वक ऐका.
छोट्या कृतींतून प्रेम व्यक्त करा
बाळाच्या जन्मानंतर पूर्वीसारखा रोमँटिक वेळ मिळत नसला, तरी त्याचा अर्थ प्रेम कमी झाले असा होत नाही. प्रेमाने बोलणे, कौतुक करणे, एखादा छोटासा संदेश पाठवणे किंवा प्रेमाने मिठी मारणे यांसारख्या साध्या कृतींमुळे नात्यातील आपलेपणा टिकून राहू शकतो.
एकमेकांच्या भावना समजून घेणे, गरजा स्पष्टपणे सांगणे आणि दोष देण्याऐवजी उपाय शोधणे महत्त्वाचे आहे. मात्र, सतत उदास वाटणे, तीव्र चिडचिड होणे किंवा दैनंदिन कामे सांभाळणे कठीण जाणे अशी लक्षणे दिसल्यास डॉक्टर किंवा समुपदेशकांचा सल्ला घ्यावा.
सांगायचे झाले तर, बाळाच्या जन्मानंतर केवळ पालक म्हणून नाही तर पती-पत्नी म्हणूनही एकमेकांना वेळ आणि आधार देणे गरजेचे आहे. परस्पर समजूतदारपणा, संवाद आणि जबाबदाऱ्यांची योग्य विभागणी यांमुळे नात्यातील गोडवा टिकवता येतो.
Source: TV9 Marathi National
