सरकारी फसवणुकीमुळे आपल्या आयुष्यातील उमेदीचा काळ कसा जातो हे माझ्यापेक्षा चांगलं कोणीच सांगू शकत नाही. जसे तुमच्या आयुष्यातील वर्ष निघून जातात तसे आमच्याही राजकीय नेत्यांच्या आयुष्यातील दिवस जातात. आमच्याकडे प्रत्येक वेळेला आयुष्यातील पाच वर्षे निघून जातात. मी अनेक वर्षे सांगत आलो की जातीपातीच्या राजकारणात पडू नका. जातीय राजकारणात तुम्हाला अडवलं जातं. यातच तुमचा वेळ गेला तर आई-वडिलांना काय तोंड दाखवणार. आम्ही जाती-पातीमध्ये पडलो आहोत. आपण हिंदू-मुसलमान यात पडलो आहोत. यातून अगोदर बाहेर या, असं मनसे प्रमुख राज ठाकरे यांनी म्हटलं आहे. त्यांनी आज एमपीएससी आंदोलकांची पुण्यात येऊन भेट घेतली त्यावेळी ते बोलत होते.
आज माझ्या मराठवाड्यातील अनेकजण पुण्यात शिकायला आलेली आहेत. रोज अभ्यास करत आहेत. पण नशिबी पेपर फुटला एवढंच येतं. तुमचा हा राज असाच कायम असणं गरजेचं आहे. मी कडवट बोलतो पण सत्य बोलतो. अनेक लोकांना माझं बोलणं त्या वेळेला झेपत नाही. पण कालांतराने समजतं की मी सत्य बोलतोय 70 हजार तरुणांची पदभरती व्हावी अशी मागणी केली जातेय. पण हे होणार नाही. लक्षात ठेवा. दुसरंं सरकार आलं तरीही ही मागणी पूर्ण होऊ शकत नाही. परीस्थिती समजून घ्या. वस्तुस्थिती समजून घ्या. पण नोकऱ्या मिळाल्याच पाहिजेत. मी 22 वर्षांपासून सतत सांगतोय की महाराष्ट्रातील नोकऱ्या या महाराष्ट्रातील मुला-मुलींनाच मिळाल्या पाहिजेत. हे जर झालं तर अशा आंदोलनांची गरजच नाही, असंही यावेळी राज ठाकरे यांनी म्हटलं आहे.
आपण आरक्षण मागतो. पण सरकारी नोकऱ्या आहेत कुठे. जे मिळेल ते खासगी होत चाललंय. त्यासाठीच केंद्र सरकार बसलं आहे. विमानतळ, पोर्ट दिसलं की दे अडाणीला असं चालूय. सगळं खासगी होत चाललंय. खासगी क्षेत्रात आरक्षण नाही. निवडणुका येतात तेव्हा जेवणावळी दिल्या जातात. दारू दिली जाते. निवडणुकीच्या वेळी पैसे फेकले की ते आपल्याला निवडून देणार हे नेत्यांना माहिती आहे. अशा नेत्यांचा हा गैरसमज जोपर्यंत दूर होत नाही तोपर्यंत तुम्हाला न्याय मिळणार नाही, असंही ते यावेळी म्हणाले.
Source: TV9 Marathi Education
