ನವದೆಹಲಿ, ನವೆಂಬರ್ 5: ನವೀಕರಣ ಇಂಧನ ವಲಯದಲ್ಲಿ ಭಾರತವು ವಿಶ್ವದ ಪ್ರಮುಖ ಶಕ್ತಿಯಾಗಿ ಸ್ಥಾಪಿತವಾಗಿದೆ ಎಂದು ಕೇಂದ್ರ ನವೀಕರಣ ಇಂಧನ ಸಚಿವ ಪ್ರಲ್ಹಾದ್ ಜೋಷಿ ಹೇಳಿದ್ದಾರೆ. ರಾಷ್ಟ್ರರಾಜಧಾನಿ ನಗರಿಯ ಭಾರತ್ ಮಂಟಪಂನಲ್ಲಿ ನಡೆದ ‘ಭಾರತ್ ರಿನ್ಯೂವಬಲ್ ಎನರ್ಜಿ ಸಮ್ಮಿಟ್ & ಎಕ್ಸ್‌ಪೋ 2026’ (BRES 2026) ಸಮಾರೋಪ ಸಮಾರಂಭದ ಬಳಿಕ ಸುದ್ದಿಗೋಷ್ಠಿಯನ್ನುದ್ದೇಶಿಸಿ ಅವರು ಮಾತನಾಡುತ್ತಿದ್ದರು.
ಭಾರತವು ತನ್ನ ಮೊದಲ 100 GW ನವೀಕರಣ ಇಂಧನ ಸಾಮರ್ಥ್ಯವನ್ನು ಸಾಧಿಸಲು ದಶಕಗಳನ್ನೇ ತೆಗೆದುಕೊಂಡಿತ್ತು. ಆದರೆ ಮುಂದಿನ 100 GW ಅನ್ನು 7 ವರ್ಷಗಳಲ್ಲಿ ಹಾಗೂ ನಂತರದ ಮೂರನೇ 100 GW ಮೈಲಿಗಲ್ಲನ್ನು ಕೇವಲ ಎರಡು ವರ್ಷಗಳಲ್ಲಿ (2024 ರಿಂದ 2026ರ ನಡುವೆ) ಸಾಧಿಸುವ ಮೂಲಕ ಇಂಧನ ವಿಸ್ತರಣೆಯ ವೇಗವನ್ನು ಗಣನೀಯವಾಗಿ ಹೆಚ್ಚಿಸಿದೆ ಎಂದು ಸಚಿವರು ವಿವರಿಸಿದ್ದಾರೆ.
ಇದನ್ನೂ ಓದಿ: 2014ಕ್ಕೆ ಮುಂಚಿನ ವೇಗ ಇದ್ದಿದ್ದರೆ ಪುಣೆಯಂಥ ನಗರಗಳಿಗೆ ಮೆಟ್ರೋ ಬರಲು ದಶಕಗಳೇ ಆಗುತ್ತಿತ್ತು: ಪ್ರಧಾನಿ ಟಾಂಟ್
ನವೀಕರಣ ಇಂಧನ ಸಾಮರ್ಥ್ಯ: 800 GW ನೂತನ ಗುರಿ
ದೇಶವು ತನ್ನ ನವೀಕರಿಸಬಹುದಾದ ಇಂಧನ ತಯಾರಿಕಾ ಸಾಮರ್ಥ್ಯದ ಗುರಿಯನ್ನು ಮತ್ತಷ್ಟು ವಿಸ್ತರಿಸಿದ್ದು, ಮುಂಬರುವ 2030-35ರ ವೇಳೆಗೆ ಒಟ್ಟು 800 GW ಶುದ್ಧ ಇಂಧನ ಉತ್ಪಾದನೆಯ ಗುರಿಯನ್ನು ಹೊಂದಲಾಗಿದೆ. ಈ ಹಿಂದೆ ಇದು 500 GW ಆಗಿತ್ತು. ನಿಗದಿತ 500 GW ಮೈಲಿಗಲ್ಲನ್ನು ನಿರೀಕ್ಷಿತ ಅವಧಿಗೂ ಮುಂಚೆಯೇ ತಲುಪುವ ವಿಶ್ವಾಸವನ್ನು ಸಚಿವ ಪ್ರಲ್ಹಾದ್ ಜೋಷಿ ವ್ಯಕ್ತಪಡಿಸಿದ್ದಾರೆ.
ಜಾಗತಿಕ ಶೃಂಗಸಭೆಯ ಯಶಸ್ಸು: ನಾಲ್ಕು ದಿನಗಳ ಕಾಲ ನಡೆದ BRES 2026 ಸಮ್ಮೇಳನದಲ್ಲಿ ವಿಶ್ವದಾದ್ಯಂತದ ನೀತಿ ನಿರೂಪಕರು, ಹೂಡಿಕೆದಾರರು ಮತ್ತು ಉದ್ಯಮದ ದಿಗ್ಗಜರು ಭಾಗವಹಿಸಿದ್ದರು. 75,000ಕ್ಕೂ ಹೆಚ್ಚು ಸಂದರ್ಶಕರು, 8 ಪಾಲುದಾರ ದೇಶಗಳು ಮತ್ತು 32 ಅಂತಾರಾಷ್ಟ್ರೀಯ ಸಚಿವರು ಈ ಸಮಾವೇಶದಲ್ಲಿ ಪಾಲ್ಗೊಂಡಿದ್ದು, ಇದು ಭಾರತದ ಹಸಿರು ಇಂಧನ ಬದ್ಧತೆಗೆ ಜಾಗತಿಕ ಮನ್ನಣೆ ದೊರೆತಿರುವುದನ್ನು ತೋರಿಸುತ್ತದೆ.
BRES 2026 ಎಂಬುದು ಭಾರತದಲ್ಲಿ ಈವರೆಗೆ ನಡೆದ ಅತಿದೊಡ್ಡ ನವೀಕರಣ ಇಂಧನ ಕಾರ್ಯಕ್ರಮವಾಗಿದೆ ಎನ್ನುವ ಮಾಹಿತಿಯನ್ನು ಜೋಷಿ ಹಂಚಿಕೊಂಡಿದ್ದಾರೆ.
ಇದನ್ನೂ ಓದಿ: ಶಕ್ತಿ ಸಂಗ್ರಹಣೆ, ವಿಸ್ತಾರ್, ಖನಿಜ ಸಂಸ್ಕರಣೆ ಯೋಜನೆಗಳಿಗೆ ಕೇಂದ್ರ ಸಂಪುಟ ಅನುಮೋದನೆ
ಹಸಿರು ಇಂಧನ ವಲಯಕ್ಕೆ 400 ಬಿಲಿಯನ್ ಡಾಲರ್ ಹೂಡಿಕೆ ಹರಿವು: ಜೋಷಿ
‘ಭಾರತದಲ್ಲಿ ಹಸಿರು ಇಂಧನ ಹಾಗೂ ಸಂಬಂಧಿತ ಕಾರ್ಯಗಳಿಗೆ 400 ಬಿಲಿಯನ್ ಡಾಲರ್ನಷ್ಟು ಹೂಡಿಕೆ ಮಾಡಲು ಹೂಡಿಕೆದಾರರು ನಿರ್ಧರಿಸಿದ್ದಾರೆ. ಆದರೆ, ಎಲ್ಲೆಲ್ಲಿ ಹೂಡಿಕೆ ಆಗಬೇಕು ಎಂಬುದನ್ನು ಅವಲೋಕಿಸಲಾಗುತ್ತಿದೆ. ವಿವಿಧ ಕಂಪನಿಗಳು, ಹೂಡಿಕೆದಾರರು, ಫಂಡ್ ಮ್ಯಾನೇಜರ್ಗಳೊಂದಿಗೆ ನಡೆದ ದುಂಡುಮೇಜಿನ ಸಭೆಯಲ್ಲಿ ದೇಶ ಮತ್ತು ವಿದೇಶಗಳಿಂದ ಹೂಡಿಕೆಗೆ ಆಸಕ್ತಿ ಮೂಡಿ ಬಂದಿದೆ’ ಎಂದು ನಿನ್ನೆ ಬುಧವಾರ ಪ್ರಲ್ಹಾದ್ ಜೋಷಿ ತಿಳಿಸಿದ್ದರು.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Source: TV9 Kannada Business
