ಫೈಬರ್ ಅಂಶದ ಕೊರತೆ ಮಲಬದ್ಧತೆ ಮತ್ತು ಜೀರ್ಣಕ್ರಿಯೆ ಸಮಸ್ಯೆಗೆ ಕಾರಣವೇ? ಈ ತಪ್ಪುಗಳನ್ನು ಸರಿಪಡಿಸಿಕೊಳ್ಳಿ

ಆರೋಗ್ಯಕರ ಜೀವನಶೈಲಿಗೆ ಪ್ರೋಟೀನ್, ವಿಟಮಿನ್ ಮತ್ತು ಖನಿಜಾಂಶಗಳಷ್ಟೇ ಫೈಬರ್ ಕೂಡ ಅತ್ಯಗತ್ಯ. ಆದರೆ ಇಂದಿನ ಆಹಾರ ಪದ್ಧತಿಯಲ್ಲಿ ಅನೇಕರು ಫೈಬರ್ ಇರುವ ಆಹಾರಗಳಿಗೆ ಹೆಚ್ಚಿನ ಆದ್ಯತೆ ನೀಡುತ್ತಿಲ್ಲ. ಬಿಳಿ ಅಕ್ಕಿ, ಮೈದಾ ಪದಾರ್ಥಗಳು ಮತ್ತು ಪ್ಯಾಕೆಟ್ ತಿಂಡಿಗಳನ್ನು ಹೆಚ್ಚು ಸೇವಿಸುವುದರಿಂದ ದೇಹಕ್ಕೆ ಅಗತ್ಯವಿರುವ ಫೈಬರ್ ಪ್ರಮಾಣ ಕಡಿಮೆಯಾಗಬಹುದು. ಇದು ಜೀರ್ಣಕ್ರಿಯೆ ಮತ್ತು ಕರುಳಿನ ಆರೋಗ್ಯದ ಮೇಲೂ ಪರಿಣಾಮ ಬೀರಬಹುದು.

ಪ್ರತಿದಿನ ಸಾಕಷ್ಟು ಫೈಬರ್ ಸೇವಿಸದಿರುವುದು

ಫೈಬರ್ ಸೇವನೆಯಲ್ಲಿ ಬಹುತೇಕರು ಮಾಡುವ ಪ್ರಮುಖ ತಪ್ಪು ಎಂದರೆ ಪ್ರತಿದಿನ ಅಗತ್ಯ ಪ್ರಮಾಣದ ಫೈಬರ್ ಇರುವ ಆಹಾರ ಸೇವಿಸದಿರುವುದು. ಆಹಾರದಲ್ಲಿ ಬೇಳೆಕಾಳುಗಳು, ತರಕಾರಿಗಳು, ಹಣ್ಣುಗಳು ಮತ್ತು ಸಂಪೂರ್ಣ ಧಾನ್ಯಗಳನ್ನು ಸೇರಿಸಿಕೊಳ್ಳದಿದ್ದರೆ ಫೈಬರ್ ಕೊರತೆ ಉಂಟಾಗಬಹುದು. ಫೈಬರ್ ಮಲಬದ್ಧತೆ ಕಡಿಮೆ ಮಾಡಲು ಮತ್ತು ಜೀರ್ಣಕ್ರಿಯೆ ಸುಧಾರಿಸಲು ಸಹಾಯ ಮಾಡುತ್ತದೆ.

ಸಲಾಡ್‌ನಿಂದ ಮಾತ್ರ ಫೈಬರ್ ಸಿಗುತ್ತದೆ ಎಂದು ಭಾವಿಸುವುದು

ಕೆಲವರು ಫೈಬರ್ ಪಡೆಯಲು ಸಲಾಡ್ ಮಾತ್ರ ಸೇವಿಸುತ್ತಾರೆ. ಆದರೆ ಫೈಬರ್ ಪಡೆಯಲು ಇನ್ನೂ ಹಲವು ಆಹಾರಗಳಿವೆ. ಕಡಲೆ, ಹೆಸರುಕಾಳು, ರಾಜ್ಮಾ, ಓಟ್ಸ್, ರಾಗಿ, ಸಿರಿಧಾನ್ಯಗಳು, ಒಣಹಣ್ಣುಗಳು, ಬೀಜಗಳು ಮತ್ತು ವಿವಿಧ ಹಣ್ಣುಗಳು ಉತ್ತಮ ಫೈಬರ್ ಮೂಲಗಳಾಗಿವೆ. ಇವುಗಳನ್ನು ಪ್ರತಿದಿನದ ಆಹಾರದಲ್ಲಿ ಸೇರಿಸಿಕೊಳ್ಳಬಹುದು.

ಏಕಾಏಕಿ ಹೆಚ್ಚು ಫೈಬರ್ ಸೇವಿಸುವುದು

ಮಲಬದ್ಧತೆ ಕಾಣಿಸಿಕೊಂಡಾಗ ಕೆಲವರು ಏಕಾಏಕಿ ಹೆಚ್ಚಿನ ಪ್ರಮಾಣದಲ್ಲಿ ಫೈಬರ್ ಸೇವಿಸಲು ಪ್ರಾರಂಭಿಸುತ್ತಾರೆ. ಇದರಿಂದ ಹೊಟ್ಟೆಯಲ್ಲಿ ಗ್ಯಾಸ್, ಉಬ್ಬರ ಮತ್ತು ಅಸ್ವಸ್ಥತೆ ಉಂಟಾಗಬಹುದು. ಆದ್ದರಿಂದ ಫೈಬರ್ ಪ್ರಮಾಣವನ್ನು ನಿಧಾನವಾಗಿ ಹೆಚ್ಚಿಸಬೇಕು. ಜೊತೆಗೆ ಸಾಕಷ್ಟು ನೀರು ಕುಡಿಯುವುದನ್ನೂ ಮರೆಯಬಾರದು.

ಇದನ್ನೂ ಓದಿ: 45 ದಿನ ಬಾಳೆಹಣ್ಣು ತಿಂದರೆ ರಕ್ತದೊತ್ತಡ ನಿಯಂತ್ರಣಕ್ಕೆ ಬರುತ್ತದೆಯೇ? ಇಲ್ಲಿದೆ ಮಾಹಿತಿ

ಹಣ್ಣು ಮತ್ತು ತರಕಾರಿಗಳ ಸಿಪ್ಪೆ ತೆಗೆಯದಿರುವುದು

ಹಣ್ಣು ಮತ್ತು ತರಕಾರಿಗಳ ಸಿಪ್ಪೆಯಲ್ಲಿಯೂ ಫೈಬರ್ ಸೇರಿದಂತೆ ಕೆಲವು ಪೋಷಕಾಂಶಗಳಿರುತ್ತವೆ. ಆದರೆ ಅನೇಕರು ಅನಗತ್ಯವಾಗಿ ಸಿಪ್ಪೆ ತೆಗೆದು ಸೇವಿಸುತ್ತಾರೆ. ಸಾಧ್ಯವಾದಲ್ಲಿ ಚೆನ್ನಾಗಿ ತೊಳೆದು, ಸುರಕ್ಷಿತವಾಗಿರುವ ಹಣ್ಣು ಮತ್ತು ತರಕಾರಿಗಳನ್ನು ಸಿಪ್ಪೆಯೊಂದಿಗೆ ಸೇವಿಸುವುದು ಉತ್ತಮ.

ಸಂಪೂರ್ಣ ಧಾನ್ಯಗಳ ಬದಲು ಸಂಸ್ಕರಿಸಿದ ಧಾನ್ಯ ಸೇವಿಸುವುದು

ಬಿಳಿ ಅಕ್ಕಿ, ಮೈದಾ ಮತ್ತು ಸಂಸ್ಕರಿಸಿದ ಧಾನ್ಯಗಳಲ್ಲಿ ಸಂಪೂರ್ಣ ಧಾನ್ಯಗಳಿಗೆ ಹೋಲಿಸಿದರೆ ಫೈಬರ್ ಪ್ರಮಾಣ ಕಡಿಮೆಯಾಗಿರುತ್ತದೆ. ಆದ್ದರಿಂದ ಆಹಾರದಲ್ಲಿ ಗೋಧಿ, ರಾಗಿ, ಓಟ್ಸ್ ಮತ್ತು ಇತರ ಸಿರಿಧಾನ್ಯಗಳನ್ನು ಸೇರಿಸಿಕೊಳ್ಳುವುದು ಉತ್ತಮ.

ಫೈಬರ್ ಹೆಚ್ಚಿಸಲು ಏನು ಮಾಡಬೇಕು?

ಪ್ರತಿದಿನದ ಊಟದಲ್ಲಿ ತರಕಾರಿಗಳಿಗೆ ಆದ್ಯತೆ ನೀಡಿ. ದಿನಕ್ಕೆ ಒಂದು ಅಥವಾ ಎರಡು ಹಣ್ಣುಗಳನ್ನು ಸೇವಿಸಿ. ಬೇಳೆಕಾಳುಗಳು, ಕಡಲೆ ಮತ್ತು ಸಂಪೂರ್ಣ ಧಾನ್ಯಗಳನ್ನು ಆಹಾರದ ಭಾಗವಾಗಿಸಿಕೊಳ್ಳಿ. ಸಾಕಷ್ಟು ನೀರು ಕುಡಿಯಿರಿ. ನಿರಂತರ ಮಲಬದ್ಧತೆ, ಹೊಟ್ಟೆ ಉಬ್ಬರ ಅಥವಾ ಮಲವಿಸರ್ಜನೆಯ ಅಭ್ಯಾಸದಲ್ಲಿ ಬದಲಾವಣೆ ಕಂಡುಬಂದರೆ ಸ್ವಯಂ ಚಿಕಿತ್ಸೆ ಮಾಡಿಕೊಳ್ಳದೆ ವೈದ್ಯರನ್ನು ಸಂಪರ್ಕಿಸುವುದು ಮುಖ್ಯ. ಸರಿಯಾದ ಆಹಾರ ಪದ್ಧತಿಯ ಮೂಲಕ ಜೀರ್ಣಕ್ರಿಯೆ ಮತ್ತು ಕರುಳಿನ ಆರೋಗ್ಯವನ್ನು ಉತ್ತಮವಾಗಿಟ್ಟುಕೊಳ್ಳಬಹುದು.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Source: TV9 Kannada National