Hashtagintro

4ನೇ ತರಗತಿಗೆ ಶಾಲೆ ಬಿಟ್ಟು ಗುರುಕುಲ ಸೇರಿದ್ದ ಬಾಲಕ ಈಗ ಇಸ್ರೋ ವಿಜ್ಞಾನಿ; ಯಜುರ್ವೇದ ಕಲಿತು JEE ಪಾಸ್ ಮಾಡಿದ ಕೇರಳದ ಯುವಕ

4ನೇ ತರಗತಿಗೆ ಶಾಲೆ ಬಿಟ್ಟು ಗುರುಕುಲ ಸೇರಿದ್ದ ಬಾಲಕ ಈಗ ಇಸ್ರೋ ವಿಜ್ಞಾನಿ; ಯಜುರ್ವೇದ ಕಲಿತು JEE ಪಾಸ್ ಮಾಡಿದ ಕೇರಳದ ಯುವಕ

ಸಾಮಾನ್ಯವಾಗಿ ಮಕ್ಕಳು ಉತ್ತಮ ಶಿಕ್ಷಣ ಪಡೆದು ದೊಡ್ಡ ಹುದ್ದೆ ಅಲಂಕರಿಸಬೇಕು ಎಂಬುದು ಪ್ರತಿಯೊಬ್ಬ ಪೋಷಕರ ಕನಸು. ಇದಕ್ಕಾಗಿ ಶಾಲೆ, ಕಾಲೇಜು, ಸ್ಪರ್ಧಾತ್ಮಕ ಪರೀಕ್ಷೆ ಎಂದು ಹಲವು ವರ್ಷಗಳ ಕಾಲ ಶ್ರಮಿಸುತ್ತಾರೆ. ಆದರೆ ಕೇರಳದ ಯುವಕನೊಬ್ಬನ ಶೈಕ್ಷಣಿಕ ಪಯಣ ಮಾತ್ರ ಎಲ್ಲರಿಗಿಂತ ವಿಭಿನ್ನವಾಗಿದೆ. ನಾಲ್ಕನೇ ತರಗತಿಯ ಬಳಿಕ ಸಾಮಾನ್ಯ ಶಾಲಾ ಶಿಕ್ಷಣವನ್ನು ತೊರೆದು ಗುರುಕುಲಕ್ಕೆ ಸೇರಿ ಯಜುರ್ವೇದ ಅಧ್ಯಯನ ಮಾಡಿದ ಈ ಯುವಕ, ಮುಂದೆ ದೇಶದ ಅತ್ಯಂತ ಕಠಿಣ ಪ್ರವೇಶ ಪರೀಕ್ಷೆಗಳಾದ JEE ಮೇನ್ ಮತ್ತು JEE ಅಡ್ವಾನ್ಸ್‌ಡ್‌ನಲ್ಲಿ ಯಶಸ್ಸು ಗಳಿಸಿದ್ದಾರೆ. ಅಷ್ಟೇ ಅಲ್ಲ, ಇದೀಗ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ISRO)ಯಲ್ಲಿ ವಿಜ್ಞಾನಿ ಹುದ್ದೆಗೂ ಆಯ್ಕೆಯಾಗಿದ್ದಾರೆ.

ಕೇರಳದ ಕಣ್ಣೂರಿನ ಗೋವಿಂದ್ ಕೃಷ್ಣನ್ ಎಂ. ಅವರ ಈ ಸಾಧನೆ ಇದೀಗ ಹಲವರ ಗಮನ ಸೆಳೆದಿದೆ. ಸಾಂಪ್ರದಾಯಿಕ ವೇದ ಶಿಕ್ಷಣ ಮತ್ತು ಆಧುನಿಕ ವಿಜ್ಞಾನ ಶಿಕ್ಷಣ ಎರಡನ್ನೂ ಸಮನಾಗಿ ಅಳವಡಿಸಿಕೊಂಡ ಅವರ ಜೀವನ ಪಯಣ ಅನೇಕರಿಗೆ ಸ್ಫೂರ್ತಿಯಾಗಿದೆ.

ನಾಲ್ಕನೇ ತರಗತಿಯ ಬಳಿಕ ಶಾಲೆ ತೊರೆದು ಗುರುಕುಲ ಸೇರಿದ ಗೋವಿಂದ್:

ಗೋವಿಂದ್ ಕೃಷ್ಣನ್ ಅವರು ಕೇರಳದ ಪಯ್ಯನ್ನೂರಿನ ಕೇಂದ್ರೀಯ ವಿದ್ಯಾಲಯದಲ್ಲಿ ನಾಲ್ಕನೇ ತರಗತಿಯವರೆಗೆ ವಿದ್ಯಾಭ್ಯಾಸ ಮಾಡಿದ್ದರು. 2011ರಲ್ಲಿ ಅವರ ತಂದೆ ಹರೀಶ್ ಕುಮಾರ್ ಅವರ ನಿರ್ಧಾರದಂತೆ ಸಾಮಾನ್ಯ ಶಾಲಾ ಶಿಕ್ಷಣದಿಂದ ಹೊರಬಂದು ತ್ರಿಶೂರ್‌ನ ಬ್ರಹ್ಮಸ್ವಂ ಮಠದ ಗುರುಕುಲಕ್ಕೆ ಸೇರಿದರು. ಹರೀಶ್ ಕುಮಾರ್ ಅವರು ಭಾರತೀಯ ನೌಕಾಪಡೆಯ ಮಾಜಿ ಅಧಿಕಾರಿಯಾಗಿದ್ದು, 2009ರಲ್ಲಿ ಸ್ವಯಂ ನಿವೃತ್ತಿ ಪಡೆದಿದ್ದರು. ತಮ್ಮ ಮಗನಿಗೆ ಸಾಂಪ್ರದಾಯಿಕ ವೇದ ಶಿಕ್ಷಣದ ಅನುಭವ ನೀಡಬೇಕು ಎಂಬುದು ಅವರ ಆಸೆಯಾಗಿತ್ತು.

ಉಪನಯನ ಸಂಸ್ಕಾರದ ಬಳಿಕ ಗೋವಿಂದ್ ಅವರು ಗುರುಕುಲದಲ್ಲಿ ಯಜುರ್ವೇದ ಅಧ್ಯಯನ ಆರಂಭಿಸಿದರು. ಕುಟುಂಬದಿಂದ ದೂರವಿದ್ದು ಗುರುಕುಲದ ಜೀವನಕ್ಕೆ ಹೊಂದಿಕೊಳ್ಳುವುದು ಆರಂಭದಲ್ಲಿ ಅವರಿಗೆ ಸುಲಭವಾಗಿರಲಿಲ್ಲ. ಆದರೆ ಗುರುಗಳ ಮಾರ್ಗದರ್ಶನದಲ್ಲಿ ವೇದ ಮಂತ್ರಗಳನ್ನು ಆಲಿಸುವುದು, ಪುನರಾವರ್ತಿಸುವುದು ಮತ್ತು ಕಂಠಪಾಠ ಮಾಡುವ ಮೂಲಕ ಶಿಕ್ಷಣ ಮುಂದುವರಿಸಿದರು.

ನಾಲ್ಕು ವರ್ಷಗಳಲ್ಲೇ ಯಜುರ್ವೇದ ಅಧ್ಯಯನ ಪೂರ್ಣ:

ಗುರುಕುಲದ ಶಿಕ್ಷಣ ಪದ್ಧತಿ ಸಾಮಾನ್ಯ ಶಾಲೆಗಳಿಗಿಂತ ಸಂಪೂರ್ಣ ಭಿನ್ನವಾಗಿತ್ತು. ಇಲ್ಲಿ ಪಠ್ಯಪುಸ್ತಕಗಳಿಗಿಂತ ಗುರುಗಳು ಹೇಳಿಕೊಡುವ ಮಂತ್ರಗಳನ್ನು ಆಲಿಸಿ, ಪುನರಾವರ್ತಿಸಿ ಕಂಠಪಾಠ ಮಾಡುವುದಕ್ಕೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತಿತ್ತು. ಗೋವಿಂದ್ ಅವರ ತಂಡದಲ್ಲಿ ಕೇವಲ ಐವರು ವಿದ್ಯಾರ್ಥಿಗಳಿದ್ದರು. ಎಲ್ಲರೂ ಯಜುರ್ವೇದ ಅಧ್ಯಯನ ಮಾಡುತ್ತಿದ್ದರು. ಈ ಕೋರ್ಸ್ ಪೂರ್ಣಗೊಳಿಸಲು ಐದು ವರ್ಷಗಳ ಅವಧಿ ನಿಗದಿಯಾಗಿದ್ದರೂ, ಗೋವಿಂದ್ ಕೇವಲ ನಾಲ್ಕು ವರ್ಷಗಳಲ್ಲೇ ಯಜುರ್ವೇದ ಅಧ್ಯಯನವನ್ನು ಪೂರ್ಣಗೊಳಿಸಿದರು. ವೇದ ಶಿಕ್ಷಣದ ಜೊತೆಗೆ ಸಾಮಾನ್ಯ ಶಾಲಾ ಶಿಕ್ಷಣವನ್ನೂ ಸಂಪೂರ್ಣವಾಗಿ ಕೈಬಿಡದೆ ಮುಂದುವರಿಸುವ ಪ್ರಯತ್ನ ಮಾಡಿದರು.

ಗುರುಕುಲದ ಜೊತೆಗೆ ಸಾಮಾನ್ಯ ಶಿಕ್ಷಣ:

ವೇದ ಅಧ್ಯಯನ ಮಾಡುತ್ತಿದ್ದರೂ ಗೋವಿಂದ್ ಅವರು ಶಾಲಾ ಶಿಕ್ಷಣದಿಂದ ದೂರ ಉಳಿಯಲಿಲ್ಲ. ಪರೀಕ್ಷೆಗಳನ್ನು ಬರೆಯಲು ಸಮೀಪದ ಸರ್ಕಾರಿ ಶಾಲೆಗೆ ದಾಖಲಾತಿ ಪಡೆದಿದ್ದರು. ಬಳಿಕ ತ್ರಿಶೂರ್‌ನ ನಾಡಕ್ಕಾವಿನ ವಿವೇಕೋದಯಂ ಬಾಯ್ಸ್ ಹೈಯರ್ ಸೆಕೆಂಡರಿ ಶಾಲೆಯಲ್ಲಿ ಎಂಟನೇ ತರಗತಿಯಿಂದ ಹತ್ತನೇ ತರಗತಿವರೆಗೆ ವಿದ್ಯಾಭ್ಯಾಸ ಮುಂದುವರಿಸಿದರು.

ಗುರುಕುಲ ಮತ್ತು ಶಾಲೆಯ ಶಿಕ್ಷಣವನ್ನು ಒಟ್ಟಿಗೆ ನಿರ್ವಹಿಸುವುದು ಸುಲಭದ ಕೆಲಸವಾಗಿರಲಿಲ್ಲ. ಅವರ ದಿನಚರಿ ಬೆಳಗ್ಗೆಯೇ ಆರಂಭವಾಗುತ್ತಿತ್ತು. ಬೆಳಗ್ಗೆ ಗುರುಕುಲದ ತರಗತಿಗಳು 8.30ರವರೆಗೆ ನಡೆಯುತ್ತಿದ್ದವು. ಬಳಿಕ ಶಾಲೆಗೆ ತೆರಳುತ್ತಿದ್ದ ಅವರು, ಶಾಲೆ ಮುಗಿದ ನಂತರ ಮತ್ತೆ ಗುರುಕುಲಕ್ಕೆ ತೆರಳಿ ರಾತ್ರಿ 9 ಗಂಟೆಯವರೆಗೆ ವೇದ ಅಧ್ಯಯನ ಮಾಡುತ್ತಿದ್ದರು. ನಂತರ ರಾತ್ರಿ 11 ಗಂಟೆಯವರೆಗೆ ಶಾಲಾ ಪಠ್ಯಗಳ ಅಭ್ಯಾಸದಲ್ಲಿ ತೊಡಗಿಸಿಕೊಳ್ಳುತ್ತಿದ್ದರು. ಇಷ್ಟೊಂದು ಕಠಿಣ ವೇಳಾಪಟ್ಟಿಯ ನಡುವೆಯೂ ಗೋವಿಂದ್ ಹತ್ತನೇ ತರಗತಿ ಪರೀಕ್ಷೆಯಲ್ಲಿ ಎಲ್ಲಾ ವಿಷಯಗಳಲ್ಲೂ A+ ಶ್ರೇಣಿ ಪಡೆದು ಗಮನಾರ್ಹ ಸಾಧನೆ ಮಾಡಿದರು.

ವಿಜ್ಞಾನ ಮತ್ತು ಎಂಜಿನಿಯರಿಂಗ್ ಕಡೆಗೆ ಆಸಕ್ತಿ:

ಹತ್ತನೇ ತರಗತಿಯ ಬಳಿಕ ಗೋವಿಂದ್ ಅವರು ಮಂಗಳೂರಿನ ಮೂಡುಬಿದಿರೆಯ ಆಳ್ವಾಸ್ ಕಾಲೇಜಿನಲ್ಲಿ ಪಿಯುಸಿ ಶಿಕ್ಷಣ ಪಡೆದರು. ಈ ಹಂತದಲ್ಲಿ ಅವರಿಗೆ ವಿಜ್ಞಾನ ಮತ್ತು ಎಂಜಿನಿಯರಿಂಗ್ ಕ್ಷೇತ್ರದ ಬಗ್ಗೆ ಹೆಚ್ಚಿನ ಆಸಕ್ತಿ ಮೂಡಿತು. ಮುಂದಿನ ವಿದ್ಯಾಭ್ಯಾಸಕ್ಕಾಗಿ ದೇಶದ ಅತ್ಯಂತ ಕಠಿಣ ಪ್ರವೇಶ ಪರೀಕ್ಷೆಗಳಲ್ಲಿ ಒಂದಾದ ಜಂಟಿ ಪ್ರವೇಶ ಪರೀಕ್ಷೆ (JEE)ಗೆ ಸಿದ್ಧತೆ ಆರಂಭಿಸಿದರು. ಅವರ ಪರಿಶ್ರಮಕ್ಕೆ ಫಲ ದೊರೆಯಿತು. ಗೋವಿಂದ್ ಅವರು JEE ಮೇನ್ ಮತ್ತು JEE ಅಡ್ವಾನ್ಸ್‌ಡ್ ಎರಡೂ ಪರೀಕ್ಷೆಗಳಲ್ಲಿ ಯಶಸ್ಸು ಗಳಿಸಿದರು. ಈ ಮೂಲಕ ತಿರುವನಂತಪುರಂನ ವಲಿಯಮಲದಲ್ಲಿರುವ ಭಾರತೀಯ ಬಾಹ್ಯಾಕಾಶ ವಿಜ್ಞಾನ ಮತ್ತು ತಂತ್ರಜ್ಞಾನ ಸಂಸ್ಥೆ (IIST)ಗೆ ಪ್ರವೇಶ ಪಡೆಯುವ ಅವಕಾಶ ದೊರೆಯಿತು.

IISTಯಲ್ಲಿ ಎಲೆಕ್ಟ್ರಾನಿಕ್ಸ್ ಮತ್ತು ಕಮ್ಯುನಿಕೇಷನ್ ಪದವಿ:

2021ರಲ್ಲಿ ಗೋವಿಂದ್ ಅವರು IISTಯಲ್ಲಿ ಎಲೆಕ್ಟ್ರಾನಿಕ್ಸ್ ಮತ್ತು ಕಮ್ಯುನಿಕೇಷನ್ ವಿಭಾಗದಲ್ಲಿ ಬಿ.ಟೆಕ್ ಪದವಿ ಶಿಕ್ಷಣ ಆರಂಭಿಸಿದರು. ಗುರುಕುಲದಲ್ಲಿ ವೇದ ಮಂತ್ರಗಳನ್ನು ಕಂಠಪಾಠ ಮಾಡುತ್ತಿದ್ದ ವಿದ್ಯಾರ್ಥಿ ಇದೀಗ ಎಲೆಕ್ಟ್ರಾನಿಕ್ಸ್, ಸಂವಹನ ವ್ಯವಸ್ಥೆಗಳು ಮತ್ತು ಆಧುನಿಕ ತಂತ್ರಜ್ಞಾನದ ಅಧ್ಯಯನದಲ್ಲಿ ತೊಡಗಿಸಿಕೊಂಡರು.

ತಮ್ಮ ಗುರುಕುಲದ ದಿನಗಳ ಶಿಸ್ತು, ಏಕಾಗ್ರತೆ ಮತ್ತು ನಿರಂತರ ಅಭ್ಯಾಸದ ಗುಣಗಳು ಉನ್ನತ ಶಿಕ್ಷಣದಲ್ಲಿಯೂ ಸಹಾಯ ಮಾಡಿದವು ಎಂದು ಗೋವಿಂದ್ ಅಭಿಪ್ರಾಯಪಟ್ಟಿದ್ದಾರೆ. ಸಾಂಪ್ರದಾಯಿಕ ಶಿಕ್ಷಣ ಮತ್ತು ಆಧುನಿಕ ವಿಜ್ಞಾನವನ್ನು ಪರಸ್ಪರ ವಿರುದ್ಧವಾಗಿ ನೋಡದೆ, ಎರಡರಿಂದಲೂ ಕಲಿಯುವ ಮನೋಭಾವವನ್ನು ಅವರು ಬೆಳೆಸಿಕೊಂಡಿದ್ದರು.

2025ರಲ್ಲಿ ಇಸ್ರೋ ವಿಜ್ಞಾನಿ ಹುದ್ದೆಗೆ ಆಯ್ಕೆ:

ಗೋವಿಂದ್ ಅವರ ಜೀವನದ ಮತ್ತೊಂದು ಮಹತ್ವದ ಮೈಲಿಗಲ್ಲು 2025ರಲ್ಲಿ ಎದುರಾಯಿತು. ಇಸ್ರೋ ಕೇಂದ್ರಿತ ನೇಮಕಾತಿ ಮಂಡಳಿ (ICRB) ಆಯ್ಕೆ ಪ್ರಕ್ರಿಯೆಯ ಮೂಲಕ ವಿಜ್ಞಾನಿ ಹುದ್ದೆಗೆ ಅವರು ಆಯ್ಕೆಯಾದರು. ಸಂದರ್ಶನ ಸೇರಿದಂತೆ ವಿವಿಧ ಮೌಲ್ಯಮಾಪನ ಪ್ರಕ್ರಿಯೆಗಳಲ್ಲಿ ಭಾಗವಹಿಸಿ ಈ ಸಾಧನೆ ಮಾಡಿದರು. 2025ರ ಜುಲೈನಲ್ಲಿ ತಿರುವನಂತಪುರಂನ ತುಂಬಾದಲ್ಲಿರುವ ವಿಕ್ರಮ್ ಸಾರಾಭಾಯಿ ಬಾಹ್ಯಾಕಾಶ ಕೇಂದ್ರದಲ್ಲಿ (VSSC) ಕರ್ತವ್ಯಕ್ಕೆ ಸೇರಲು ಅವರು ನಿರ್ಧರಿಸಿದ್ದರು. ಭಾರತದ ಬಾಹ್ಯಾಕಾಶ ಕಾರ್ಯಕ್ರಮಕ್ಕೆ ಅಗತ್ಯವಿರುವ ಉಡಾವಣಾ ವಾಹನಗಳ ಅಭಿವೃದ್ಧಿಯಲ್ಲಿ ಈ ಕೇಂದ್ರ ಪ್ರಮುಖ ಪಾತ್ರ ವಹಿಸುತ್ತದೆ. ನಾಲ್ಕನೇ ತರಗತಿಯ ಬಳಿಕ ಗುರುಕುಲದಲ್ಲಿ ಯಜುರ್ವೇದ ಕಲಿಯಲು ಆರಂಭಿಸಿದ ಬಾಲಕ, ಮುಂದೆ ದೇಶದ ಹೆಮ್ಮೆಯ ಬಾಹ್ಯಾಕಾಶ ಸಂಸ್ಥೆಯ ವಿಜ್ಞಾನಿ ಹುದ್ದೆಗೆ ಆಯ್ಕೆಯಾಗಿರುವುದು ನಿಜಕ್ಕೂ ವಿಶೇಷ ಸಾಧನೆಯಾಗಿದೆ.

ಇದನ್ನೂ ಓದಿ: 68ರ ವಯಸ್ಸಿನಲ್ಲೂ ಕಲಿಕೆಯ ಉತ್ಸಾಹ; ನಿವೃತ್ತ ಅಧಿಕಾರಿ ಈಗ ಸೈಕಾಲಜಿ ಸ್ಟೂಡೆಂಟ್!

ವೇದ ಶಿಕ್ಷಣವನ್ನು ಮುಂದುವರಿಸುವ ಆಸೆ:

ಆಧುನಿಕ ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರದಲ್ಲಿ ವೃತ್ತಿಜೀವನ ಆರಂಭಿಸಿದರೂ ಗೋವಿಂದ್ ತಮ್ಮ ಸಾಂಪ್ರದಾಯಿಕ ಶಿಕ್ಷಣವನ್ನು ಮರೆಯಲು ಸಿದ್ಧರಿಲ್ಲ. ಪ್ರತಿದಿನ ಕನಿಷ್ಠ ಒಂದು ಅಥವಾ ಎರಡು ಗಂಟೆಗಳ ಕಾಲ ವೇದ ಅಧ್ಯಯನ ಮತ್ತು ಆಧ್ಯಾತ್ಮಿಕ ಅಭ್ಯಾಸಗಳಿಗೆ ಮೀಸಲಿಡುವ ಆಸೆ ಹೊಂದಿದ್ದಾರೆ. ಗುರುಕುಲದಲ್ಲಿ ತಾವು ಕಲಿತ ವಿದ್ಯೆಯನ್ನು ಮುಂದಿನ ದಿನಗಳಲ್ಲಿ ಮಕ್ಕಳಿಗೂ ಕಲಿಸಬೇಕು ಎಂಬ ಆಶಯವನ್ನೂ ವ್ಯಕ್ತಪಡಿಸಿದ್ದಾರೆ. ತಮ್ಮ ಶಿಕ್ಷಣದ ಆಯ್ಕೆಯ ಬಗ್ಗೆ ಯಾವುದೇ ಪಶ್ಚಾತ್ತಾಪವಿಲ್ಲ ಎಂದು ಹೇಳಿರುವ ಗೋವಿಂದ್, ಗುರುಕುಲದ ಜೀವನದಿಂದ ಶಿಸ್ತು, ಏಕಾಗ್ರತೆ ಮತ್ತು ನಿರಂತರ ಪರಿಶ್ರಮದ ಗುಣಗಳನ್ನು ಕಲಿತಿದ್ದಾಗಿ ತಿಳಿಸಿದ್ದಾರೆ.

ವಿಭಿನ್ನ ಶಿಕ್ಷಣದ ಹಾದಿಯಲ್ಲೂ ಯಶಸ್ಸು ಸಾಧ್ಯ ಎಂಬುದಕ್ಕೆ ಸಾಕ್ಷಿ:

ಗೋವಿಂದ್ ಕೃಷ್ಣನ್ ಅವರ ಪಯಣ ಶಿಕ್ಷಣಕ್ಕೆ ಒಂದೇ ದಾರಿಯಿಲ್ಲ ಎಂಬುದನ್ನು ತೋರಿಸುತ್ತದೆ. ನಾಲ್ಕನೇ ತರಗತಿಯ ಬಳಿಕ ಸಾಂಪ್ರದಾಯಿಕ ಶಾಲಾ ಶಿಕ್ಷಣದಿಂದ ಭಿನ್ನವಾದ ಹಾದಿ ಆಯ್ಕೆ ಮಾಡಿಕೊಂಡರೂ, ಅವರು ಮತ್ತೆ ಮುಖ್ಯವಾಹಿನಿಯ ಶಿಕ್ಷಣಕ್ಕೆ ಮರಳಿ JEE ಮೇನ್, ಅಡ್ವಾನ್ಸ್‌ಡ್ ಪರೀಕ್ಷೆಗಳಲ್ಲಿ ಯಶಸ್ಸು ಗಳಿಸಿ ಇಸ್ರೋ ವಿಜ್ಞಾನಿಯಾಗುವ ಹಂತ ತಲುಪಿದ್ದಾರೆ.

ಗುರುಕುಲದ ಶಿಸ್ತು, ವೇದ ಅಧ್ಯಯನದ ಏಕಾಗ್ರತೆ ಮತ್ತು ಆಧುನಿಕ ವಿಜ್ಞಾನದ ಮೇಲಿನ ಆಸಕ್ತಿ ಇವೆಲ್ಲವೂ ಅವರ ಜೀವನದಲ್ಲಿ ಮಹತ್ವದ ಪಾತ್ರ ವಹಿಸಿವೆ. ಕನಸು ಕಾಣುವುದಷ್ಟೇ ಅಲ್ಲ, ಅದಕ್ಕಾಗಿ ನಿರಂತರವಾಗಿ ಶ್ರಮಿಸಿದರೆ ವಿಭಿನ್ನ ಹಾದಿಯಲ್ಲೂ ದೊಡ್ಡ ಸಾಧನೆ ಮಾಡಬಹುದು ಎಂಬುದಕ್ಕೆ ಗೋವಿಂದ್ ಅವರ ಕಥೆ ಉತ್ತಮ ಉದಾಹರಣೆಯಾಗಿದೆ.

ಶಿಕ್ಷಣ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Source: TV9 Kannada Education

Read full article on TV9 Kannada Education

Leave a Comment

Your email address will not be published. Required fields are marked *

समाचार की भाषा चुनें / Choose News Language