व्हाइट हाऊसपासून दुबईपर्यंत भारतीय संस्कृतीचा डंका! परदेशात कशी साजरी झाली धडाकेबाज दिवाळी?

दिवाळी हा केवळ भारताचाच नव्हे, तर आता जगभरात आवडीने साजरा केला जाणारा एक जागतिक उत्सव बनला आहे. अमेरिकेतील सत्ताकेंद्राचे मुख्य ठिकाण असणाऱ्या व्हाइट हाऊसमध्ये राष्ट्राध्यक्ष डोनाल्ड ट्रम्प यांनी अत्यंत पारंपरिक पद्धतीने दिवा प्रज्वलित करून दिवाळी साजरी केली. या दिमाखदार सोहळ्यात भारतीय वंशाच्या अनेक प्रतिष्ठित अमेरिकन नागरिकांसह अमेरिकेतील भारताचे राजदूत विनय क्वात्रा हे ओव्हल ऑफिसमध्ये विशेष उपस्थित होते. ट्रम्प यांच्या या दीपोत्सव सोहळ्याने संपूर्ण जगभरात भारतीय समुदायाचे मन जिंकले आहे.
दुसरीकडे, दुबईमध्ये देखील जागतिक समुदायाने एकत्र येत दिवाळीचा अनोखा सोहळा साजरा केला. दुबईतील भारताच्या महावाणिज्य दूतावासाने ‘एफओआय इव्हेंट्स’च्या सहकार्याने भव्य जागतिक दिवाळी महोत्सवाचे आयोजन केले होते. या सोहळ्यात विविध देशांचे राजनयिक आणि यूएईचे अधिकारी मोठ्या संख्येने सामील झाले होते. विशेष म्हणजे, दुबईत प्रथमच एवढ्या मोठ्या प्रमाणावर विविध देशांच्या सहभागातून हा उत्सव रंगला. यामध्ये श्रीलंका, इंडोनेशिया, नेपाळ, मलेशिया आणि थायलंड या देशांनी आपले खास स्टॉल थाटत आपापल्या संस्कृतीतील दिवाळीसदृश परंपरा जगासमोर मांडल्या. या सांस्कृतिक देवाणघेवाणीने भारत आणि इतर देशांमधील मैत्रीचे बंध आणखी घट्ट केले.
https://www.prahaar.in/2026/11/08/president-droupadi-murmu-pm-narendra-modi-and-top-leaders-extend-diwali-wishes-pray-for-peace-prosperity/
याशिवाय, भारतातील युरोपीय महासंघाचे राजदूत जीन एरिक यांनी आयुष्यात पहिल्यांदाच दिवाळीचा सण अतिशय उत्साहात साजरा केला. कुवेतमधील भारतीय दूतावासाने इंडिया हाऊसमध्ये ‘दिवाळी दिवानिया’ या नावाने दोन दिवसीय संस्मरणीय कार्यक्रमाचे आयोजन केले होते. भारत-कुवेत राजनैतिक संबंधांना 65 वर्षे पूर्ण झाल्याच्या औचित्याने भारतीय आणि कुवेती परंपरांचा सुंदर मिलाफ या कार्यक्रमात पाहायला मिळाला. रॉयल नॉर्वेजियन दूतावासानेही सोशल मीडिया प्लॅटफॉर्म ‘एक्स’वरून खास संदेश देत सर्वांना दिवाळीच्या मनःपूर्वक शुभेच्छा दिल्या. इस्रायलमध्येही भारतीय नागरिकांनी आणि स्थानिक मित्रमंडळांनी एकत्र येऊन आनंदात हा सण साजरा केला.
परदेशातील या अभूतपूर्व उत्साहाने हे सिद्ध केले आहे की, दिवाळीचा प्रकाश आता केवळ भारतापुरता मर्यादित नसून तो संपूर्ण जगाच्या अंधाराला दूर करत आहे. या जागतिक दीपोत्सवाने पुन्हा एकदा वसुधैव कुटुंबकम् ही भावना जगभरात अधोरेखित केली आहे.

Source: Prahaar News