पालघर: पश्चिम रेल्वेवर येत्या शनिवारी आणि रविवारी रात्रकालीन मेगाब्लॉक घेण्यात येणार आहे. त्यामुळे मुंबईकरांनो जर तुम्ही शनिवारी रात्री उशिरा पश्चिम रेल्वेने प्रवास करणार असाल तर, एकदा ही बातमी आवश्य वाचा. पश्चिम रेल्वेवरील वसई रोड आणि वैतरणा स्थानकादरम्यान काही तांत्रिक कामांसाठी मेगाब्लॉक घेण्यात येणार आहे. जलद मार्गावरील अप आणि डाऊन या दोन्हीही मार्गिकेंवर हा मेगाब्लॉक घेण्यात येणार आहे. शनिवारी आणि रविवारी रात्रकालीन मेगाब्लॉक घेण्यात आल्यानंतर, रविवारच्या दिवशी पूर्ण दिवस, पश्चिम रेल्वेवर कोणताही मेगाब्लॉक घेण्यात येणार नाही.
पश्चिम रेल्वेवरील वसई रोड आणि वैतरणा स्थानकांदरम्यान शनिवारी आणि रविवारी 14 नोव्हेंबर आणि 15 नोव्हेंबरच्या रात्री मेगाब्लॉक घेण्यात येणार आहे. पश्चिम रेल्वेचे मुख्य जनसंपर्क अधिकारी, विनीत अभिषेक यांनी दिलेल्या प्रसिद्धीपत्रकानुसार, हा ‘जम्बो ब्लॉक’ शनिवारी आणि रविवारीच्या रात्री वसई रोड आणि वैतरणा स्थानकांदरम्यान ‘अप’ (Up) जलद मार्गावर रात्री 11.55 ते मध्य रात्री 02.55 पर्यंत आणि ‘डाउन’ (Down) जलद मार्गावर मध्य रात्री 01.30 ते पहाटे 04.30 वाजेपर्यंत मेगाब्लॉक घेण्यात येणार आहे. रविवारी, 15 नोव्हेंबर 2026 रोजी दिवसाच्या वेळी कोणताही ‘जम्बो ब्लॉक’ नसेल.
दरम्यान, मध्य रेल्वेच्या मुंबई विभागात, विविध अभियांत्रिकी आणि देखभालीची कामे करण्यासाठी रविवारी, 15 नोव्हेंबर 2026 रोजी उपनगरीय मार्गांवर ‘मेगा ब्लॉक’ घेण्यात येणार आहे. ठाणे आणि कल्याण स्थानकांदरम्यान ‘अप’ आणि ‘डाऊन’ धिम्या मार्गांवर सकाळी 11 ते सायंकाळी 4 वाजेपर्यंत ब्लॉक असेल. मुलंड स्थानकावरून सुटणाऱ्या ‘डाऊन’ धिम्या आणि सेमी फास्ट लोकल सेवा सकाळी 10.43 ते दुपारी 03.53 या वेळेत मुलंड आणि कल्याण स्थानकांदरम्यान ‘डाऊन’ जलद मार्गावर वळवल्या जातील. कल्याण स्थानकावरून सुटणाऱ्या ‘अप’ धिम्या आणि सेमी फास्ट लोकल सेवा सकाळी 10.36 ते दुपारी 03.51 या वेळेत कल्याण आणि मुलंड स्थानकांदरम्यान ‘अप’ जलद मार्गावर वळवल्या जातील.
Source: Prahaar News
