सिंधुदुर्ग जिल्ह्यातील चिपी विमानतळ आणि नवी मुंबई विमानतळ यांच्यात विमानसेवा सुरू झाल्याने आता कोकणातील प्रवाशांसाठी एक नवा आणि जलद पर्याय उपलब्ध झाला आहे. ही सेवा आठवड्याचे सातही दिवस उपलब्ध असणार आहे, त्यामुळे सिंधुदुर्ग आणि नवी मुंबई दरम्यानची कनेक्टिव्हिटी लक्षणीयरीत्या वाढणार आहे. या विमानसेवेमुळे आता अवघ्या एक तास 10 मिनिटांत थेट सिंधुदुर्ग गाठणे शक्य होणार आहे, ज्यामुळे प्रवासाचा वेळ मोठ्या प्रमाणात वाचणार आहे. या विमानसेवेच्या उद्घाटनपर प्रवासावेळी राज्याचे मंत्री नितेश राणे आणि दीपक केसरकर हे उपस्थित होते. त्यांनी या पहिल्याच विमानातून प्रवास करत या सेवेला हिरवा कंदील दाखवला.
ही सेवा केवळ प्रवाशांसाठीच नव्हे, तर सिंधुदुर्ग जिल्ह्यातील पर्यटन आणि आर्थिक विकासालाही चालना देणारी ठरेल, अशी अपेक्षा व्यक्त केली जात आहे. कमी वेळेत पोहोचता येत असल्याने पर्यटक आणि व्यावसायिकांना याचा मोठा फायदा होईल. ही नवीन विमानसेवा कोकणातील दळणवळणामध्ये एक महत्त्वाचा टप्पा ठरणार आहे.
Source: TV9 Marathi National