Rising Stars Asia Cup India A squad : आगामी रायझिंग स्टार्स एशिया कपसाठी निवडण्यात आलेल्या भारत-अ संघात महत्त्वाचे बदल करण्यात आले आहेत. दुखापतींमुळे त्रस्त असलेल्या रजत पाटीदारने, आपण सध्या ५० षटकांच्या सामन्यांच्या स्वरूपात निवडीसाठी उपलब्ध राहू इच्छित नाही, अशी माहिती भारतीय क्रिकेट नियामक मंडळाला (बीसीसीआय) दिली आहे. या निर्णयानंतर त्याला आगामी स्पर्धेसाठीच्या भारत-अ संघातून वगळण्यात आले आहे. त्याच्या जागी युवा खेळाडू आयुष बदोनीचा संघात समावेश करण्यात आला आहे, तर स्फोटक फलंदाज रिंकू सिंहकडे संघाच्या उपकर्णधारपदाची धुरा सोपवण्यात आली आहे.
दुखापतींमुळे पाटीदारचा मोठा निर्णय
बीसीसीआयने प्रसिद्ध केलेल्या अपडेटनुसार, रजत पाटीदार सध्या त्याच्या जुन्या दुखापतींमधून पूर्णपणे सावरण्यावर आणि तंदुरुस्तीवर लक्ष केंद्रित करत आहे. याच कारणामुळे त्याने ५० षटकांच्या फॉरमॅटसाठी आपल्या नावाचा विचार केला जाऊ नये, अशी विनंती केली होती. पाटीदारच्या या निर्णयानंतर त्याला एसीसी रायझिंग स्टार्स एशिया कपसाठीच्या भारत-अ संघातून बाजूला करण्यात आले आहे. निवड समितीने त्याच्या रिप्लेसमेंट म्हणून आयुष बदोनीला संघात स्थान दिले आहे.
रिंकू सिंहकडे उपकर्णधारपदाची धुरा
संघातील रचनेत नेतृत्वाच्या बाबतीतही एक महत्त्वाचा बदल करण्यात आला आहे. निवड समितीने धडाडीचा फलंदाज रिंकू सिंहची भारत-अ संघाच्या उपकर्णधारपदी नियुक्ती केली आहे. या दौऱ्यातही तिलक वर्मा पूर्वीप्रमाणेच संघाचे नेतृत्व सांभाळणार आहे. या संतुलित संघात अभिषेक शर्मा, वैभव सूर्यवंशी आणि प्रभसिमरन सिंह यांसारख्या प्रतिभावान खेळाडूंचाही समावेश आहे. तसेच, यष्टिरक्षक फलंदाज म्हणून प्रभसिमरन सिंह आणि कुमार कुशाग्र या दोघांना संघात संधी देण्यात आली आहे.
रायझिंग स्टार्स आशिया कपसाठी भारत ‘अ’ संपूर्ण संघ खालीलप्रमाणे
-
कर्णधार: तिलक वर्मा : उपकर्णधार: रिंकू सिंह
-
फलंदाज: अभिषेक शर्मा, वैभव सूर्यवंशी
-
यष्टीरक्षक: प्रभसिमरन सिंह, कुमार कुशाग्र
-
अष्टपैलू (ऑलराउंडर): सूर्यांश शेडगे, शाहबाज अहमद, विप्रज निगम, हर्ष दुबे, तनुष कोटियन, आयुष बदोनी वेगवान
-
गोलंदाज: हर्षित राणा, प्रिन्स यादव, अर्शद खान
Source: Pudhari News
