नागपूर: धम्मचक्र प्रवर्तन दिनाच्या पार्श्वभूमीवर नागपूरला भेट देणाऱ्या लाखो भाविकांच्या सुरक्षित आणि सुलभ प्रवासासाठी मध्य रेल्वेच्या नागपूर विभागाने व्यापक तयारी केली आहे. दिनांक 19 ते 22 ऑक्टोबर 2026 या चार दिवसांच्या कालावधीत नागपूर आणि अजनी स्थानकांवर सुमारे अडीच लाख अतिरिक्त प्रवासी येण्याची शक्यता वर्तवण्यात आली आहे. प्रवाशांची गर्दी नियंत्रित करण्यासाठी आणि त्यांना सर्वसोयी उपलब्ध करून देण्यासाठी रेल्वे प्रशासनाकडून विशेष नियोजन करण्यात आले आहे.
26 विशेष गाड्या आणि तात्पुरते थांबे
प्रवाशांच्या वाढत्या गर्दीला सामावून घेण्यासाठी मध्य रेल्वेने 26 विशेष गाड्या चालवण्याची घोषणा केली आहे. याशिवाय, या कालावधीत 14 गाड्यांना अजनी स्थानकावर तात्पुरता थांबा देण्यात आला आहे, जेणेकरून प्रवाशांना शहराच्या मध्यवर्ती भागात पोहोचणे सोपे जाईल.
गर्दी नियोजनासाठी ‘होल्डिंग एरिया’ आणि पार्किंगवर बंदी
प्रतीक्षा क्षेत्रे: नागपूर स्थानकाच्या पूर्व बाजूला संत्रा मार्केट परिसरात आणि अजनी स्थानकाच्या पार्किंग क्षेत्रात अतिरिक्त प्रवासी प्रतीक्षा क्षेत्रे (होल्डिंग एरिया) उभारण्यात येत आहेत. येथे प्रकाश व्यवस्था, पंखे, फिरती प्रसाधनगृहे आणि बसण्याची व्यवस्था असेल.
कार पार्किंग बंद: गर्दीच्या सुयोग्य नियोजनासाठी 19 ते 22 ऑक्टोबर दरम्यान नागपूर आणि अजनी स्थानकांवरील कार पार्किंग सुविधा पूर्णपणे बंद राहणार आहेत. प्रवाशांनी पर्यायी व्यवस्था करून स्थानकावर पोहोचावे, असे आवाहन करण्यात आले आहे.
प्लॅटफॉर्म तिकिटांवर बंदी: स्थानकांवरील गर्दी रोखण्यासाठी या चार दिवसांत प्लॅटफॉर्म तिकिटांच्या विक्रीवर तात्पुरती बंदी असेल.
https://www.prahaar.in/2026/10/19/bmc-has-removed-over-52000-illegal-banners-and-posters-from-mumbai-in-the-year-2026/
अतिरिक्त तिकीट खिडक्या व दीक्षाभूमीवर मदत केंद्र
मोबाईल युटीएस (UTS): नागपूर आणि अजनी स्थानकांवरील गर्दी टाळण्यासाठी पाच अतिरिक्त ‘मोबाईल अनरिझर्व्हड तिकीटिंग सिस्टम’ आणि प्रतीक्षा क्षेत्रांमध्येही तिकीट सुविधा उपलब्ध असतील.
विशेष सहाय्यता केंद्र: भाविकांच्या सोयीसाठी थेट दीक्षाभूमी परिसरात एक विशेष ‘प्रवासी सहाय्यता केंद्र’ सुरू करण्यात आले आहे. येथे विशेष गाड्यांचे वेळापत्रक आणि तिकीट मिळवण्याबाबत मार्गदर्शन केले जाईल.
वैद्यकीय सुविधा, स्वच्छता आणि चोख सुरक्षा
आरोग्य व मदत: प्रवाशांच्या मार्गदर्शनासाठी दोन्ही स्थानकांवर ‘मे आय हेल्प You’ बूथ असतील. आपत्कालीन परिस्थितीसाठी रुग्णवाहिका व वैद्यकीय सुविधा सज्ज ठेवण्यात आल्या आहेत. तसेच शुद्ध पिण्याच्या पाण्याची अतिरिक्त सोय केली गेली आहे.
स्वच्छता: स्वच्छता मोहीम (SCDPM-6) अंतर्गत स्थानके व होल्डिंग एरिया स्वच्छ ठेवण्यासाठी अतिरिक्त कर्मचारी नेमले आहेत.
सुरक्षा: सुरक्षा व्यवस्था बळकट करण्यासाठी अतिरिक्त आरपीएफ (RPF) जवान आणि लोहमार्ग पोलीस 24 तास गस्त घालणार असून, महत्त्वाच्या ठिकाणी अतिरिक्त सीसीटीव्ही कॅमेरे बसवण्यात आले आहेत.
प्रवाशांनी प्रवासापूर्वी अधिकृत माध्यमांवरून विशेष गाड्यांच्या वेळा व थांब्यांची खात्री करून घ्यावी आणि रेल्वे प्रशासनाला सहकार्य करावे, असे आवाहन मध्य रेल्वेने केले आहे.
Source: Prahaar News
