तनिष्क शोरूममधील दागिन्यांच्या चोरीप्रकरणी मदुराई शहर पोलिसांनी मोठी कारवाई केली आहे. मुख्य आरोपी निशांतची जवळची मैत्रीण आणि इन्स्टाग्राम इन्फ्लुएन्सर मीनाक्षी हिला अटक करण्यात आली आहे. तसेच निशांतचे वडील अशोक यांनाही अटक करण्यात आली आहे. मात्र मुख्य आरोपी निशांत अद्याप फरार असून त्याचा शोध घेण्यासाठी विशेष पथके काम करत आहेत. मीनाक्षीच्या वैयक्तिक इन्स्टाग्राम अकाउंटवर १ लाखांहून अधिक फॉलोअर्स आहेत. ती टेक्नॉलॉजी उत्पादनांचे रिव्ह्यू व्हिडिओ बनवते. ती ‘टेकबॉस इंडिया’ या १० लाख फॉलोअर्स असलेल्या पेजशीही जोडलेली होती. निशांतही तिच्यासोबत व्हिडिओमध्ये दिसला आहे. त्याचे स्वतःचे वेगळे अकाउंट असून त्यावर तो ट्रॅव्हल व्हिडिओ टाकतो आणि व्हिडिओ एडिटर म्हणून काम करतो.
पोलिसांच्या माहितीनुसार, निशांतने शोरूममध्ये अनेक वेळा जाऊन पाहणी केल्यानंतर या दरोड्याचा प्लॅन आखला होता. “निशांतने शोरूममध्ये अनेक वेळा भेट देऊन चोरीचा कट रचला. त्याची जवळची मैत्रीण मीनाक्षी आणि वडील अशोक यांचाही या प्रकरणाशी संबंध आहे. चोरीचे दागिने कुठे लपवले आहेत, हे मीनाक्षीला माहीत होते. फरार निशांतचा शोध सुरू आहे,” असे वरिष्ठ अधिकाऱ्याने सांगितले. सुरुवातीला सीसीटीव्हीमध्ये एकट्या मुखवटा घातलेल्या व्यक्तीने शोरूममध्ये घुसून दागिने घेऊन पळ काढल्याचे दिसले होते. मात्र तपासात आणखी सीसीटीव्ही फुटेज आणि पुरावे तपासल्यानंतर मीनाक्षी आणि अशोक यांचे संबंध समोर आले.
https://www.prahaar.in/2026/11/15/20-year-old-youth-arrested-for-conducting-recce-of-nariman-house-in-mumbai-ahead-of-26-11-attacks/
अटकेनंतर मीनाक्षीने दागिने कुठे लपवले आहेत, याची माहिती दिली. त्यानंतर पोलिसांनी एका निर्जन ठिकाणी पुरून ठेवलेले ५ किलोहून अधिक दागिने जप्त केले. ४ सप्टेंबरच्या रात्री तनिष्क शोरूममधून १०.५ किलो सोन्याचे आणि १ किलो हिऱ्यांचे दागिने चोरीला गेले होते. या प्रकरणाच्या तपासासाठी पोलिसांनी नऊ विशेष पथके तयार केली होती. हे शोरूम नुकतेच सुरू झाले होते आणि तिथे काही बांधकाम सुरू होते. तसेच सुरक्षेत काही त्रुटी असल्याचेही तपासात समोर आले आहे. अटक केलेल्या दोघांना न्यायदंडाधिकाऱ्यांसमोर हजर केले जाणार आहे.
Source: Prahaar News
