बॉलिवूडमध्ये आपल्या दमदार अभिनयासाठी ओळखले जाणारे अभिनेते नाना पाटेकर हे त्यांच्या चित्रपटांइतकेच वैयक्तिक आयुष्यामुळेही अनेकदा चर्चेत राहिले आहेत. नाना पाटेकर यांचं नाव अभिनेत्री मनीषा कोईराला आणि आयशा झुल्का यांच्यासोबत जोडलं गेलेलं. विशेष म्हणजे, नानांशी असलेल्या जवळिकीवरून या दोन्ही अभिनेत्रींच्या नात्यातही कटुता निर्माण झाल्याच्या चर्चा रंगल्या होत्या. २००३ मध्ये प्रदर्शित झालेल्या एका चित्रपटानंतर या चर्चांना अधिक उधाण आलं होतं. नेमकं काय घडलं होतं? जाणून घेऊया.
आयशा झुल्का आणि नाना पाटेकर यांच्या चर्चा
९०च्या दशकात अभिनेत्री आयशा झुल्का बॉलिवूडमधील लोकप्रिय अभिनेत्रींपैकी एक होती. अक्षय कुमार, आमिर खान, मिथुन चक्रवर्ती यांसारख्या आघाडीच्या अभिनेत्यांसोबत तिने काम केलं होतं. ‘खिलाडी’ आणि ‘जो जीता वही सिकंदर’ या चित्रपटांमुळे तिला विशेष लोकप्रियता मिळाली. अक्षय कुमारसोबत तिच्या नावाची चर्चा झाली होती. मात्र, पुढे नाना पाटेकर यांच्यासोबतच्या कथित प्रेमसंबंधांमुळेही ती चर्चेत आली. २००३ मध्ये प्रदर्शित झालेल्या ‘आंच’ या चित्रपटात नाना पाटेकर आणि आयशा झुल्का यांनी एकत्र काम केलं होतं. या चित्रपटात दोघांचे काही बोल्ड आणि इंटिमेट सीन्स होते. या चित्रपटाच्या शूटिंगदरम्यान दोघांमधील जवळीक वाढल्याचं वृत्त होतं. त्यावेळी नाना पाटेकर पत्नीपासून वेगळे राहत असल्याच्याही चर्चा होत्या.
मनीषा कोईरालाला आवडत नव्हती आयशा आणि नानांची मैत्री?
नाना पाटेकर आणि मनीषा कोईराला यांच्या अफेअरच्या चर्चा याच काळात रंगल्या होत्या. मात्र, ‘आंच’ चित्रपटानंतर नाना आणि आयशा यांची मैत्री अधिक घट्ट झाल्याचं सांगितलं जातं. नाना आणि आयशा यांच्यातील वाढती जवळीक मनीषाला आवडत नव्हती. त्यामुळे मनीषा आणि आयशा यांच्यात वाद झाल्याच्या बातम्याही समोर आल्या होत्या. काही काळानंतर नाना पाटेकर आणि मनीषा कोईराला यांचे मार्ग वेगळे झाले. त्यानंतर नाना पाटेकर आणि आयशा झुल्का लिव्ह-इन रिलेशनशिपमध्ये राहत असल्याच्या चर्चाही रंगल्या होत्या. मात्र, काही वर्षांनी त्यांच्यातही दुरावा निर्माण झाला. यानंतर आयशा झुल्कानं बॉलिवूडपासून दूर जाण्याचा निर्णय घेतला. पुढे तिनं व्यावसायिक समीर वाशी यांच्याशी लग्न केलं.
Source: TV9 Marathi National
