Solapur Mahayuti Door To Door Campaign
कासेगाव : पुणे विभागीय पदवीधर व शिक्षक मतदारसंघाच्या निवडणुकीसाठी प्रचाराची मुदत संपल्याने प्रचाराची रणधुमाळी थंडावली आहे. उद्या मतदान होणार असल्याने दक्षिण सोलापूर तालुक्यातील बोरामणी, वळसंग आणि धोत्री या मतदान केंद्रांच्या कार्यक्षेत्रात निवडणुकीविषयी उत्सुकता निर्माण झाली आहे. मतदारांचा कौल कोणाच्या बाजूने जाणार, याबाबत परिसरातील राजकीय वर्तुळात चर्चा सुरू आहे.
भाजपच्या पुणे विभागीय पदवीधर मतदारसंघाच्या अधिकृत उमेदवार डॉ. स्मिता योगेश जाधव आणि शिक्षक मतदारसंघाचे अधिकृत उमेदवार कौस्तुभ मुरलीधर गावडे यांच्या प्रचारासाठी जिल्हा परिषद सदस्य नेताजी खंडागळे यांच्यासह स्थानिक भाजप समर्थकांनी पुढाकार घेतला होता. प्रचाराच्या कालावधीत कार्यकर्त्यांनी परिसरातील विविध गावांमध्ये घरोघरी जाऊन मतदारांशी संपर्क साधला. प्रचारपत्रकांचे वाटप करून दोन्ही उमेदवारांची भूमिका आणि माहिती पदवीधर व शिक्षक मतदारांपर्यंत पोहोचविण्याचा प्रयत्न करण्यात आला.
प्रचाराच्या अंतिम टप्प्यात उमेदवारांच्या समर्थकांनी मतदारांपर्यंत पोहोचण्यासाठी प्रयत्नांची पराकाष्ठा केली. मात्र, प्रचाराची अधिकृत मुदत संपल्यानंतर प्रचाराच्या हालचालींना विराम मिळाला आहे. आता सर्वांचे लक्ष मतदान प्रक्रियेकडे लागले आहे.
उद्या होणाऱ्या मतदानात पदवीधर आणि शिक्षक मतदार कोणाला पसंती देतात, याबाबत उत्सुकता आहे. बोरामणी, वळसंग आणि धोत्री परिसरातील मतदानाचा कल निवडणुकीच्या दृष्टीने महत्त्वाचा ठरणार असल्याने स्थानिक राजकीय कार्यकर्त्यांमध्येही निकालाबाबत अंदाज बांधले जात आहेत.
Source: Pudhari News
