Hashtagintro

Raksha Khadse: माझ्याकडे तेवढे सभासद आहेत की मी…; मुक्ताईनगरच्या जागेसाठी रक्षा खडसे ठाम, महायुतीत तिढा कायम!

Raksha Khadse: माझ्याकडे तेवढे सभासद आहेत की मी…; मुक्ताईनगरच्या जागेसाठी रक्षा खडसे ठाम, महायुतीत तिढा कायम!

जळगाव जिल्हा बँकेच्या निवडणुकीच्या पार्श्वभूमीवर महायुतीमधील जागावाटपाचा तिढा अद्याप कायम आहे. मुक्ताईनगरच्या जागेवरून भाजप आणि शिवसेनेच्या शिंदे गटात रस्सीखेच सुरू असल्याचं चित्र आहे. केंद्रीय राज्यमंत्री रक्षा खडसे यांनी मुक्ताईनगर सोसायटी मतदारसंघातून उमेदवारी अर्ज दाखल केला आहे. या जागेवरून निवडणूक लढवण्याची तयारी असल्याचं स्पष्ट केलं आहे. मात्र अंतिम निर्णय पक्षश्रेष्ठी घेतील, असंही त्यांनी सांगितलं.

महायुतीच्या जागावाटपाबाबत दोन दिवसांपूर्वी बैठक पार पडल्याची माहिती रक्षा खडसे यांनी दिली. या बैठकीत पालकमंत्री गुलाबराव पाटील आणि भाजपचे नेते गिरीश महाजन यांच्यात चर्चा झाली आहे. कोणत्या पक्षाला किती जागा मिळणार आणि कोणत्या मतदारसंघातून कोण लढणार, हे जागावाटप निश्चित झाल्यानंतरच स्पष्ट होईल, असं त्यांनी सांगितलं. मुक्ताईनगरच्या जागेसाठी शिवसेनेचा शिंदे गटही आग्रही असल्याबाबत विचारलं असता रक्षा खडसे यांनी आपली भूमिका स्पष्ट केली.

प्रत्येक पक्ष आपापल्या परीने जागेसाठी आग्रह धरत असतो. शेवटी हा मतांचा खेळ आहे. माझ्याकडे तेवढे सभासद आणि मतं आहेत की मी निवडून येऊ शकते. त्यामुळे पक्ष याचा नक्कीच विचार करेल, असं त्या म्हणाल्या. तसेच ज्या ठिकाणी महायुतीमधील जागावाटपाचा तिढा सुटणार नाही, तिथे मैत्रीपूर्ण लढत होण्याची शक्यताही त्यांनी नाकारली नाही. अशी लढत झाली तर आपण लढण्यासाठी आधीपासूनच तयार असल्याचं रक्षा खडसे यांनी स्पष्ट केलं.

मुक्ताईनगरची जागा भाजपला मिळावी आणि तिथून आपण निवडून यावं, अशी अपेक्षा असल्याचं रक्षा खडसे यांनी सांगितलं. भाजपच्या जास्तीत जास्त जागा निवडून याव्यात यासाठी पक्षातील सर्वजण प्रयत्न करत आहेत. मात्र, गिरीश महाजन आणि पक्षश्रेष्ठी जो निर्णय घेतील, तो आपल्याला मान्य असेल, असंही त्यांनी स्पष्ट केलं. समोरच्या उमेदवाराबाबत बोलणं टाळत त्यांनी संबंधित व्यक्तीला आपण जास्त महत्त्व देत नसल्याचं म्हटलं. त्यामुळे जिल्हा बँक निवडणुकीत मुक्ताईनगरची जागा भाजपच्या वाट्याला येणार की शिंदे गट आपला दावा कायम ठेवणार, याकडे राजकीय वर्तुळाचं लक्ष लागलं आहे.

नाशिकमध्ये गोदावरी नदीवर छठ पूजेच्या पार्श्वभूमीवर होणाऱ्या व्यवस्थेबाबत आणि विद्रुपीकरणाच्या मुद्द्यावरही रक्षा खडसे यांनी प्रतिक्रिया दिली. हा प्रशासनाच्या अखत्यारीतील विषय असून छठ पूजेचं महत्त्व वाढत आहे. उत्तर प्रदेश आणि बिहारमधील नागरिक नोकरी-व्यवसायानिमित्त महाराष्ट्रात स्थायिक झाले असल्याने राज्यातही हा सण मोठ्या प्रमाणावर साजरा होतो. कुंभमेळ्याच्या पार्श्वभूमीवर कोणतीही गैरसोय किंवा गैरवापर होऊ नये, यासाठी सरकार आणि प्रशासन नियोजन करत आहे. संबंधित तक्रारीची प्रशासनाने दखल घेऊन कारवाई करावी, असं त्या म्हणाल्या.

Source: TV9 Marathi National

Read full article on TV9 Marathi National

Leave a Comment

Your email address will not be published. Required fields are marked *

समाचार की भाषा चुनें / Choose News Language