Ramayana: अभिनेता रणबीर कपूरच्या बहुचर्चित ‘रामायण’ चित्रपटाची सध्या मनोरंजनविश्वात जोरदार चर्चा सुरू आहे. भव्य सेट, दमदार व्हीएफएक्स आणि कलाकारांची मोठी फौज यामुळे या चित्रपटाकडून प्रेक्षकांना मोठ्या अपेक्षा आहेत. मात्र, आता या चित्रपटावरून एक नवा वाद निर्माण झाला आहे. बी. आर. चोप्रा यांच्या लोकप्रिय ‘महाभारत’ मालिकेत भगवान श्रीकृष्णाची भूमिका साकारणारे अभिनेते नितीश भारद्वाज यांनी ‘रामायण’वर तीव्र नाराजी व्यक्त केली आहे. विशेष म्हणजे, काही महिन्यांपूर्वी याच चित्रपटाला ऑस्कर मिळेल, अशी भविष्यवाणी त्यांनी केली होती. मात्र, चित्रपट पाहिल्यानंतर त्यांनी आपलं आधीचं कौतुक मागे घेतलं आहे.
नेमकं काय म्हणाले नितीश भारद्वाज?
नितीश भारद्वाज यांनी सोशल मीडियावर एक सविस्तर पोस्ट शेअर केली. यामध्ये त्यांनी ‘रामायण’ चित्रपटातील रावणाच्या व्यक्तिरेखेवर आक्षेप घेतला आहे. रामायण ही केवळ मनोरंजनासाठी सांगितली जाणारी कथा नसून भारताच्या सांस्कृतिक, आध्यात्मिक आणि सभ्यताविषयक ओळखीचा महत्त्वाचा भाग आहे. त्यामुळे या महाकाव्यातील प्रमुख पात्रांचे मूळ स्वरूप आणि त्यांचे महत्त्व बदलताना विशेष काळजी घेणं आवश्यक आहे, असं ते म्हणाले. चित्रपटात यशने साकारलेल्या रावणाला अत्यंत उदारमतवादी, सामाजिक न्याय मानणारा आणि न्यायप्रिय राजा म्हणून दाखवण्यात आल्याचं भारद्वाज यांनी म्हटलं आहे. अशा प्रकारच्या मांडणीमुळे रामायणातील मूळ नैतिक चौकट बदलते आणि श्रीरामांच्या अवतारामागील उद्देशालाच धक्का बसतो, असं त्यांचं म्हणणं आहे.
नितीश भारद्वाज यांची पोस्ट
View this post on Instagram
चित्रपटातील भव्य दृश्ये आणि अत्याधुनिक व्हीएफएक्स यावरही त्यांनी नाराजी व्यक्त केली. केवळ तांत्रिक भव्यता म्हणजे एखाद्या महाकाव्याचं यश नाही. त्यातील तत्त्वज्ञान, आध्यात्मिक गाभा आणि मूळ मूल्ये जपणं अधिक महत्त्वाचं आहे, असं त्यांनी स्पष्ट केलं. ‘मी या चित्रपटामुळे अत्यंत नाराज आणि निराश आहे. माझं याआधीचं कौतुक मी मागे घेत आहे. या चित्रपटाबद्दल सांगण्यासारखी एकही चांगली गोष्ट मला आढळत नाही. व्हीएफएक्सचा भव्य देखावा या महाकाव्याची तात्त्विक खोली आणि आध्यात्मिक सार यांची जागा घेऊ शकत नाही,’ अशा आशयाची पोस्ट त्यांनी केली.
तसंच भारतीय इतिहास, वारसा आणि आध्यात्मिक मूल्यांचं चुकीचं चित्रण करणाऱ्या चित्रपटाने आंतरराष्ट्रीय स्तरावर भारतीय सिनेमाचं प्रतिनिधित्व करू नये, असंही त्यांनी म्हटलं आहे. विशेष म्हणजे, ‘रामायण’चा ट्रेलर पाहिल्यानंतर नितीश भारद्वाज यांनी चित्रपटाचं भरभरून कौतुक केलं होतं. दिग्दर्शक नितेश तिवारी यांच्या दिग्दर्शनाचं, भव्य निर्मितीचं आणि व्हीएफएक्सचं त्यांनी विशेष कौतुक केलं होतं. संगीतकार हान्स झिमर आणि ए. आर. रहमान यांच्या सहकार्याचंही त्यांनी स्वागत केलं होतं. एवढंच नव्हे तर या चित्रपटाला सर्वोत्कृष्ट परदेशी चित्रपटाच्या श्रेणीत 100 टक्के ऑस्कर मिळेल, असा विश्वासही त्यांनी व्यक्त केला होता. मात्र, चित्रपट पाहिल्यानंतर त्यांची भूमिका पूर्णपणे बदलली आहे.
Source: TV9 Marathi Entertainment
