RJ Mahvash Viral Video: भारतीय क्रिकेटपटू युजवेंद्र चहल आणि कोरिओग्राफर धनश्री वर्मा यांच्या वैयक्तिक आयुष्याची चर्चा आजही सोशल मीडियावर होत असते. लग्नाच्या जवळपास चार वर्षांनंतर मार्च २०२५ मध्ये दोघांचा घटस्फोट झाला. या काळात धनश्रीला सोशल मीडियावर मोठ्या प्रमाणात ट्रोलिंगचा सामना करावा लागला. काही नेटकऱ्यांनी तर तिला ‘गोल्ड डिगर’ असेही म्हटले होते. आता पुन्हा एकदा चहल आणि धनश्री चर्चेत आले आहेत. यावेळी चर्चेचे कारण ठरला आहे आरजे महवशचा एक जुना व्हिडिओ.
आरजे महवशच्या एका जुन्या मुलाखतीतील काही भाग सध्या सोशल मीडियावर व्हायरल होत आहे. या व्हिडिओमध्ये ती एका अशा व्यक्तीबद्दल बोलत आहे, ज्याने आपल्या गर्भवती पत्नीला धोका दिला होता. महवशच्या या वक्तव्याचा संबंध नेटकऱ्यांनी थेट युजवेंद्र चहल आणि धनश्री वर्मा यांच्या घटस्फोटाशी जोडला. त्यामुळे चहलने धनश्रीला धोका दिला होता का, असा प्रश्न उपस्थित केला जात आहे. मात्र, या व्हायरल व्हिडिओमागचे सत्य वेगळेच आहे.
महवशने चहलवर धनश्रीला धोका दिल्याचा आरोप केला होता?
आरजे महवशने पिंकव्हिलाला दिलेल्या एका जुन्या मुलाखतीतील काही भाग सध्या चर्चेत आहे. या मुलाखतीमध्ये ती एका व्यक्तीबद्दल बोलताना म्हणते, “ज्या गोष्टींपासून देव तुम्हाला वाचवतो, त्याबद्दल तुम्ही त्याचे आभार मानले पाहिजेत. या व्यक्तीचा घटस्फोट झाला होता, कारण त्याने आपल्या गर्भवती पत्नीला धोका दिला होता. एकदा धोका देणारी व्यक्ती पुन्हा धोका देऊ शकते. अशा व्यक्तीला बदलू शकत नाही.”
महवशचे हे वक्तव्य समोर आल्यानंतर सोशल मीडियावर वेगवेगळ्या चर्चा सुरू झाल्या. अनेकांनी तिच्या वक्तव्याचा संबंध युजवेंद्र चहलशी जोडला. चहल आणि धनश्री यांच्या घटस्फोटाच्या पार्श्वभूमीवर महवशने त्याच्याबद्दलच हे विधान केले असावे, असा अंदाज काही नेटकऱ्यांनी व्यक्त केला. मात्र, संपूर्ण मुलाखत पाहिल्यानंतर या चर्चांमध्ये तथ्य नसल्याचे स्पष्ट होतं.
काय आहे व्हायरल व्हिडिओमागचे सत्य?
व्हायरल व्हिडिओचा संपूर्ण भाग पाहिल्यास आरजे महवश नेमकी कोणाबद्दल बोलत होती, हे समोर येते. मुलाखतीमध्ये तिने स्वतःच्या आयुष्यातील एका जुन्या अनुभवाबद्दल सांगितले होते.
महवशने सांगितले की, ती अवघ्या १९ वर्षांची असताना फेसबुकच्या माध्यमातून तिची एका तरुणाशी ओळख झाली होती. हा तरुण उत्तर प्रदेशातील अलीगढचा रहिवासी होता. त्यामुळे महवशच्या वक्तव्याचा संबंध चहलशी जोडणे चुकीचे आहे. कारण युजवेंद्र चहल हा हरियाणाचा रहिवासी आहे.
म्हणजेच, महवशने केलेले वक्तव्य चहल किंवा धनश्रीबद्दल नव्हते. मात्र, मुलाखतीतील काही सेकंदांचा व्हिडिओ सोशल मीडियावर व्हायरल झाल्याने गैरसमज निर्माण झाला.
अशी सुरू झाली होती चहल आणि धनश्रीची प्रेमकहाणी
युजवेंद्र चहल आणि धनश्री वर्मा यांची ओळख २०२० मध्ये कोरोना लॉकडाऊनच्या काळात झाली होती. ऑनलाइन डान्स क्लासच्या माध्यमातून दोघांची भेट झाली. सुरुवातीला असलेली ओळख हळूहळू मैत्रीत बदलली. त्यानंतर दोघेही एकमेकांच्या जवळ आले.
काही काळ एकमेकांना डेट केल्यानंतर डिसेंबर २०२० मध्ये दोघांनी लग्न केले. गुरुग्राम येथे कुटुंबीय आणि जवळच्या नातेवाईकांच्या उपस्थितीत त्यांचा विवाहसोहळा पार पडला. मात्र, लग्नाच्या काही वर्षांनंतर त्यांच्या नात्यात दुरावा निर्माण झाल्याच्या चर्चा सुरू झाल्या.
फेब्रुवारी २०२५ मध्ये चहल आणि धनश्री मुंबईतील वांद्रे कौटुंबिक न्यायालयाबाहेर दिसले होते. दोघांनी परस्पर संमतीने घटस्फोटासाठी अर्ज दाखल केला होता. त्यानंतर काही आठवड्यांतच न्यायालयाने त्यांच्या घटस्फोटाला मंजुरी दिली. अशा प्रकारे दोघांचे वैवाहिक नाते कायदेशीररीत्या संपुष्टात आले.
घटस्फोटानंतर चहलचे नाव आरजे महवशसोबत जोडले गेले
धनश्रीपासून विभक्त झाल्यानंतर युजवेंद्र चहलचे नाव अनेकदा आरजे महवशसोबत जोडले गेले. दोघेही अनेकदा एकत्र दिसल्याने त्यांच्या नात्याबद्दल चर्चा सुरू झाली होती. मात्र, चहल आणि महवश या दोघांनीही आम्ही चांगले मित्र आहोत असे सांगितले आहे.
एका मुलाखतीमध्ये चहलनेही महवश ही आपली चांगली मैत्रीण असल्याचे स्पष्ट केले होते. आयुष्यातील कठीण काळात तिने आपल्याला साथ दिल्याचेही त्याने सांगितले होते.
दरम्यान, महवशच्या जुन्या मुलाखतीचा व्हिडिओ व्हायरल झाल्यानंतर चहल आणि धनश्रीच्या घटस्फोटाबद्दल पुन्हा चर्चा सुरू झाली आहे. मात्र, महवशचे गर्भवती पत्नीला धोका देण्याबाबतचे वक्तव्य चहलशी संबंधित नसल्याचे संपूर्ण मुलाखतीतून स्पष्ट होते.
Source: Pudhari News
