रात्रीच्या जेवणात रोज तेच पदार्थ खाऊन कंटाळा आला असेल, तर यावेळी डिनरमध्ये काहीतरी वेगळे ट्राय करा. हॉटेलमध्ये मिळणारे व्हेजिटेबल सूप तुम्ही घरीही अगदी सोप्या पद्धतीने बनवू शकता. विविध भाज्या आणि योग्य मसाल्यांचा वापर केल्यास सूपला छान चव येते. हलके, चविष्ट आणि पौष्टिक डिनर करण्यासाठी हा एक चांगला पर्याय आहे. विशेष म्हणजे, हे सूप बनवण्यासाठी फार वेळ लागत नाही आणि घरात उपलब्ध असलेल्या भाज्यांचाही वापर करता येतो. चला तर मग, जाणून घेऊया हॉटेलसारखे व्हेजिटेबल सूप घरी बनवण्याची सोपी रेसिपी.
हे व्हेजिटेबल सूप बनवण्यासाठी तुम्हाला आवश्यक आहे
– गाजर
– बीन्स
– शिमला मिरची
– कोबी
– मटार
– स्वीट कॉर्न
– हिरवा कांदा
– लसूण
– आले
– व्हिनेगर
– मिक्स हर्ब्स
– चिली फ्लेक्स
– काळी मिरी पावडर
– कॉर्न फ्लोर
– पाणी
– तेल
– मीठ
व्हेजिटेबल सूप बनवण्याची रेसिपी
हॉटेल सारखे व्हेजिटेबल सूप बनवण्यासाठी सर्वप्रथम सर्व भाज्या धुवून बारीक चिरून घ्या. नंतर एका मोठ्या कढईत थोडे तेल गरम करून त्यात ४-५ लसूण पाकळ्या, आले आणि हिरव्या कांदा परतून घ्या. आता त्यात गाजर, बीन्स, शिमला मिरची घालून मिक्स करा. हे साधारण एक मिनिट परतून घ्या. आता त्यात कोबी, मटार, स्वीट कॉर्न घालून हलके परतून घ्या. नंतर त्यात पाणी घाला. मीठ घालून नीट मिक्स करा. आता हे सूप झाकून भाज्या शिजेपर्यंत उकळून घ्या. मध्ये मध्ये ढवळा आणि चेक करा. सूपमधील भाज्या क्रंची असाव्यात, जास्त शिजवलेल्या भाजीची चव चांगली लागणार नाही.
भाज्या शिजत असताना कॉर्न फ्लोअर पाण्यात मिसळून बॅटर तयार करा. भाज्या शिजल्यावर सूपमध्ये घालून घट्ट होईपर्यंत उकळून घ्या. आता व्हिनेगर, मिक्स हर्ब्स, चिली फ्लेक्स आणि काळी मिरी पावडर घाला. ते चांगले मिक्स करा. नंतर शेवटी हिरवा कांदा घाला आणि सूपचा आनंद घ्या. या सूपमध्ये तुम्ही तुमच्या आवडत्या भाज्यांचा समावेश करू शकता आणि ज्या भाज्या आवडत नाही त्या स्किप करू शकता.
Source: TV9 Marathi Lifestyle
