लांबच्या प्रवासासाठी वंदे भारत स्लीपर ट्रेनने जाण्याचा विचार करत असाल, तर तिकीट बुक करण्याआधी काही महत्त्वाचे आणि नवे नियम जाणून घेणे महत्त्वाचे आहे. एवढचं नाही तर तिकिट रद्द करण्याचे नियमही वेगळे आहेत. जाणून घ्या सविस्तर
वंदे भारत स्लीपरमध्ये तात्काळ तिकीटांचा कोटा ठेवण्यात आलेला नाही. त्यामुळे प्रवाशांना आगाऊ आरक्षण कालावधीतच नियमित पद्धतीने तिकीट बुक करावं लागेल. याशिवाय तिकीट कन्फर्म असणे आवश्यक आहे. RAC किंवा वेटिंग लिस्टवरील तिकीट घेऊन प्रवास करता येणार नाही.
सध्या देशात हावडा – कामाख्या, वाराणसी – नवी दिल्ली आणि बेंगळूरू-मुंबई या तीन मार्गांवर वंदे भारत स्लीपरच्या गाड्या धावत आहेत. या ट्रेनमध्ये एकूण 16 डब्बे असून, त्यात 11 एसी थ्री टियर, 4 एसी टू टियर आणि 1 फर्स्ट एसी डबा आहे.संपूर्ण ट्रेनमध्ये मिळून 823 प्रवाशांच्या प्रवासाची सोय आहे.
आता सर्वात महत्त्वाचा मुद्दा म्हणजे तिकीट रद्द केल्यास किती पैसे परत मिळणार? रेल्वेच्या नियमांनुसार ट्रेन सुटण्याच्या वेळेच्या 72 तासांपेक्षा आधी कन्फर्म तिकिट रद्द केल्यास भाड्याच्या 25 टक्के रक्कम कापली जाईल. म्हणजेच उर्वरित 75 टक्के रक्कम परत मिळेल.
प्रवासाला 72 तासांपेक्षा कमी आणि 8 तासांपर्यंत वेळ शिल्लक असताना तिकिट रद्द केल्यास तिकीटातील 50 टक्के रक्कम कापली जाईल. मात्र ट्रेन सुटायला 8 तासांपेक्षा कमी वेळ उरला असेल, तर तिकिट रद्द केल्यावर कोणताही परतावा मिळणार नाही. तिकीट रद्द न करता किंवा ठरलेल्या वेळेत ऑनलाईन टीडीआर दाखल न केल्यासही परतावा मिळणार नाही.
Source: TV9 Marathi Business
