भारतीय क्रिकेटविश्वामध्ये आयपीएल ही स्पर्धा अतिशय महत्त्वाची मानली गेली. यामध्ये पुरुषांचा खेळ पाहायला मिळतो तर महिलांसाठीही आयापीएलच्या धर्तीवर WPLचं आयोजित केलं जातं. आता आगागी हंगामाच्या पार्श्वभूमीवर महिला प्रीमियर लीग 2027 साठीचा मिनी लिलाव कोची येथे होत आहे. या लिलावात जास्तीत जास्त 34 खेळाडूंची विक्री होणार आहे. एकूण 150 खेळाडूंचा समावेश करण्यात आला आहे. सुरुवातीला लिलावाच्या यादीत केवळ 146 खेळाडूंचा समावेश होता. परंतु फ्रँचायझींच्या विनंतीनुसार आणखी चार खेळाडू जोडण्यात आले आहेत. सर्व संघांकडे आधीच महत्त्वाचे खेळाडू आहेत. त्यामुळे सर्व संघ काही निवडक जागा भरण्याचा प्रयत्न करतील.
ऑस्ट्रेलियाची स्टार अष्टपैलू खेळाडू सोफी मोलिन्यूक्सवर महिला प्रीमियर लीग 2027च्या मिनी-लिलावात मोठ्या रकमेचा वर्षाव झाला आहे. रॉयल चॅलेंजर्स बंगळूरसोबतच्या कडव्या स्पर्धेनंतर, यूपी वॉरियर्सने मोलिन्यूक्सला तब्बल 1.1 कोटी रुपयांना आपल्या संघात सामील करून घेतले. 50 लाख रुपयांच्या मूळ किमतीसह लिलावात प्रवेश केलेल्या मोलिन्यूक्सने बोली सुरू होताच दोन्ही संघांमध्ये स्पर्धा सुरू केली आणि अवघ्या 40 सेकंदात तिची किंमत ९५ लाख रुपयांपर्यंत पोहोचली. आरसीबीने 1.05 कोटी रुपयांपर्यंत जोरदार प्रयत्न केले, पण अखेरीस यूपी वॉरियर्सने बोली जिंकण्यात यश मिळवले.
ऑस्ट्रेलियाची टी20 विश्वचषक विजेती कर्णधार, सोफी मोलिन्यूक्सची डब्ल्यूपीएलमधील कामगिरी प्रभावी आहे. 2024 मध्ये विजेतेपद पटकावणाऱ्या रॉयल चॅलेंजर्स बंगळूर संघाचा ती एक महत्त्वाचा भाग होती, जिथे तिने 10 सामन्यांमध्ये 12 बळी घेतले होते. मात्र, कमरेच्या दुखापतीमुळे तिला डब्ल्यूपीएल 2026 मध्ये सहभागी होता आले नाही. जवळपास दोन महिन्यांच्या विश्रांतीनंतर, तिने न्यूझीलंडविरुद्धच्या टी-२० मालिकेत आंतरराष्ट्रीय क्रिकेटमध्ये उल्लेखनीय पुनरागमन केले.
सर्वात मोठ्या रकमेसह लिलावात उतरलेल्या यूपी वॉरियर्स संघासाठी सोफी मोलिन्यू एक उत्तम पर्याय ठरू शकते. ती केवळ एक धोकादायक डावखुरी फिरकी गोलंदाजच नाही, तर खालच्या फळीतील एक उपयुक्त आक्रमक फलंदाजसुद्धा आहे. शिवाय, ऑस्ट्रेलियाला विश्वविजेतेपद मिळवून देण्याचा तिचा अनुभव भविष्यात यूपी वॉरियर्ससाठी नवीन संधी निर्माण करू शकतो.
Source: TV9 Marathi Sports
