केज :- मुख्यमंत्र्यांनी शेतकऱ्यांना पाच हजाराची तुटपुंजी मदत जाहीर केली आहे. त्याचा गांधीगिरी पद्धतीने निषेध व्यक्त करण्यासाठी एका अल्पभूधारक शेतकऱ्याने मुख्यमंत्री देंवेद्र फडणवीस यांना ५ हजारची मनी ऑर्डर केली आहे. आपल्या शेतातील सोयाबीन विकून मुख्यमंत्र्यांनी त्यांच्या कुटुंबियांची दिवाळी साजरी करण्यासाठी हे पाच हजार रुपये आणि शेतकरी भावाकडून त्यांच्या पत्नीला एक साडी भेट म्हणून पाठविली आहे.
या वर्षी राज्यातील अनेक जिल्ह्यात दुष्काळी परिस्थिती असल्याने शेतकऱ्यांना दिवाळीसाठी पाच हजार रुपयांची मदत जाहीर केली आहे. मात्र महागाईच्या परिस्थितीत ही मदत अत्यंत तोकडी आहे. या अल्प मदतीत शेतकऱ्यांना दिवाळी कशी साजरी करायची? याचा निषेध व्यक्त करण्यासाठी बीड जिल्ह्यातील वरपगाव ता. केज येथील अल्पभूधारक शेतकरी विजयकुमार खंदारे यांनी त्यांच्या शेतातील सोयाबीन विकून, दि. २२ ऑक्टोबर रोजी मुख्यमंत्र्यांना पाच हजार रु. ची मनीऑर्डर पाठविली आहे.
या पाच हजार रुपयांमध्ये मध्ये मुख्यमंत्र्यांनी त्यांच्या कुटुंबाची दिवाळी साजरी करावी. फटाके आणि फराळाचे साहित्य खरेदी करावे म्हणून ही पाच हजार रु. पाठविले आहेत. तसेच शेतकरी भावाच्यावतीने मुख्यमंत्री देवेंद्र फडणवीस यांच्या पत्नी अमृताताई फडणवीस यांच्यासाठी एक साडीसुद्धा पाठविली आहे.
विजयकुमार खंदारे यांनी शेतकऱ्यांसाठी जाहीर करण्यात आलेल्या मदतीचा अनोख्या पद्धतीने विरोध दर्शवून शेतकऱ्यांना भरीव मदत करण्याची मागणी केली असून जर शासन त्याचा विचार करीत नसेल तर अनेक शेतकरी ही मदत देखील स्वीकारणार नसल्याचे म्हटले आहे.
Source: Pudhari News
