मुंबई (विशेष प्रतिनिधी) : मुंबईला पाणी पुरवठा करणाऱ्या तानसा धरण क्षेत्रामध्ये सध्या तानसा धरणावर ट्रान्सफॉर्मर आणि वेल्डिंग केबल्स चोरल्या जात आहेत. मात्र, या अज्ञात व्यक्तींचा शोध लागला जात नसून आता त्यासाठी महापालिकेच्यावतीने अतिरिक्त सीसी टिव्ही कॅमेरा बसवण्याचा निर्णय महापालिकेने घेतला आहे.
मुंबईला पाणी पुरवठा करणाऱ्या या तानसा धरणातून दिवसाला ४५० दशलक्ष लिटर एवढा पाण्याचा पुरवठा केला जातो. या धरणाव्यतिरिक्त, तानसा धरण परिसरात एक निरीक्षण बंगला, मोडक बंगला, एस.ई. क्वार्टर्स, सहाय्यक अभियंता (तानसा) यांचे कार्यालय, प्रशासकीय कार्यालय, दवाखाना, सुरक्षा चौकी, वायरलेस नियंत्रण कक्ष, परिवहन कर्मचारी कक्ष, भांडार कक्ष, तानसा धरणाला लागून असलेली एक आउटलेट विहीर, लघु जल विद्युत प्रकल्प (टर्बाइन) आणि कार्यशाळा बांधण्यात आल्या आहेत. तानसा धरण मुंबई शहरापासून ९० किमी अंतरावर घनदाट जंगल परिसरात वसलेले असून भांड़प कॉम्प्लेक्स विभागामार्फत तानसा धरणाच्या काही ठिकाणी म्हणजे धरणाचे प्रवेशद्वार तानसा यार्ड स्काडा रूम धरणाचे मुख्य प्रवेशदार आउटलेट आणि उर्वरित स्पिलवे भागावर सीसीटीव्ही निगराणी प्रणाली बसवण्यात आली आहे.
https://www.prahaar.in/2026/11/03/a-panel-of-12-consultants-for-laying-a-network-of-sewage-pipelines-in-mumbai/
अधिकाऱ्यांच्या म्हणण्यानुसार, या ठिकाणी सीसीटीव्ही निगराणी प्रणाली असूनही, तानसा धरणातील काही यंत्रे सीसीटीव्ही निगराणीच्या कक्षेत येत नाहीत. अलीकडेच, तानसा विभागातील वर्कशॉप आणि फिल्टर प्लांटच्या आवारातून अज्ञात व्यक्तीने ट्रान्सफॉर्मर आणि वेल्डिंग केबल्स चोरल्या आहेत. वर्कशॉपजवळ सीसीटीव्ही कॅमेरे उपलब्ध नसल्यामुळे चोरांचा शोध घेणे कठीण झाले. सीसीटीव्ही प्रणाली सामान्यतः इमारतीतील तसेच तिच्या सभोवतालच्या परिसरातील हालचालींवर लक्ष ठेवण्यासाठी आणि त्यांची नोंद करण्यासाठी वापरली जाते. या प्रणालींचा उपयोग प्रामुख्याने चोरी किंवा तोड फोड यांसारख्या गुन्ह्यांचा सामना करण्यासाठी केला जातो. शिवाय, तानसा धरण घनदाट जंगल परिसरात येत असल्यामुळे, कोणतीही अनपेक्षित घटना टाळण्यासाठी सीसीटीव्ही निगराणी प्रणाली उपलब्ध करून देणे आवश्यक असल्याने अतिरिक्त सीसी टिव्ही कॅमेरा तानसा धरण क्षेत्रात बसवले जात आहेत. यासाठी जैन इंजिनिअरींग या कंपनीची निवड करण्यात आली असून यावर सुमारे ५० लाख रुपये खर्च केले जाणार आहेत.
Source: Prahaar News
